موقف مش لطيف مريت به قبل شوية
هذا اليوم على قد ماهو زي أي يوم عادي، الا انه فيبه حاجة ثانية كذا. مش عارف ايش في، بس في حاجة متغيرة. كمان يكون الناس تواقين لإنتقاد اي حد يبين او يبان عليه اي تفصيلة مهما كانت صغيرة تعكس اي نوع من المحبة، أو الحب..! شعب مجبول على النكد، والوعويل، والمصائب..!
المهم وانا ماشي لقيت طفلة شقلبت بطفل، وهامت على وجهه
النجوم اللي بعيني لمعين؛ قلت بكون شاهد على أول لحظة حب بين هذين الطفلين ” ماتتجاوز اعمارهم السبع” القلبة كانت عنيفه، قلت معليش الطفله حبها كبير وكذا، ولقيت الطفل يصيح قلت اوبااا لهذي الدرجة البوسة اثرت فيه ههه
لقيتها طبعت طقم اسنانها بوجهه، مش على شكل قلب ايوة، بس ومن الحب ما قحص تحصل عادي، واسألوا المغددودين.. الطفل حرر نفسه منها، وبدأ بيهجم عليها عشان يحضنها وكذا اطفال يا خي واندمج اكثر من اللازم، بس شاف معاها اسلحة نوعية ويمكن يتخربش: اظافر طوال، واسنان محدده، وتكشيره ما ترحم.. فستسلم، ولجئ لإحدى منظمات المجتمع المدني المتوفرة امامه ممثله بي، وحضرتنا طبعًا ما ينفعش ندخل؛ لأنه قد سبق وتدخلت والبنت ما خلت حد من اهلاتي الا وشتمته!! لطيفه، ومؤدبة جدًا هي البنت، ياخي عاللاطفه، والكياته اخييييييه بس
غير ان هذي الحارة مافيش بيننا اي معاهدات، او مواثيق متفق عليها للتعاون، او السلام، ولو تدخلت بتحدث حرب عالمية بين الحارتين!
فكتفيت بالتهدئه، والصياح من بعيد:
بس يا بنت.. بس يا ماما.. يكفيه حرام.. ولكأننا هنا!
فضطر الطفل يلجئ لمجلس الأمم المتحدة الممثلة بأميه.. معه ام واحدة، بس خلونا نحسبها بثنتين وانتم افهموها. وبعدين هي اهبلته؛ من كثرت حبسها له؛ بحجة خوفها عليه! لما جت مهرية انا خفت لا تبلع البنت! الهرايه هذي حق هجوم ضد العمالقة، ضد الغيلان، ضد وحوش اسطورية كذا.. مش ضد طفلة خااالص.
والبنت بنت اللذينا ولا في حسها، بعدت شوية كذا ومارسة هويتها في الشتم، والعرعره!
البنت مش بنت شوار.ع زي ماقد تتوقعوا خااالص ولله، حتى ابوها دكتور، واخوتها كلهم مهندسين، وطيار.. بس معاها اخ واحد.. الاكبر منها بشوية؛ حولها من طفلة حلوة لطيفة بريئة؛ لبلطجية، سفيهه، حق مشاكل!
المهم اللجنة الحقوقية تدخلت، ووقفت سد منيع امام مجلسة الأمم المهرية، وتم التهدئه.
بس ومع ذلك في خرفان محد عرف كيف يضبطهم، او يربطهم، او يحد من هياجهم؛ تدخلوا بشكل يخالف كافة المواثيق، والمعاهدات المخرفن عليها! وكادت تؤدي هذه الخرفنه لمشكلة اكبر من المشكلة الصغير بين الطفلين.
بس انسحبت بهدوء، بعد ملتموا، وهاجوا، وماجوا، وطبعًا تم لومي.. فأطلقت اقدامي للرياح، وخليت العاقل يصترف يسد بينهم.
#عيد_النثرات
#ليش_كذا_يابقمه
لؤي العزعزي
يمكنك دعم الموقع من هنا
مؤسسة ندى لحماية الفتيات
المعاهدات والمواثيق المخرفن عليها هههههههههههههههههههههههههههههههههههههههههههههههههههههههههههههههههههههههههههههه
الموضوع كبيييير هههههه
ههههه 😂
انت السبب
انا في الكليه قريت حتى رأيت عرض المزيد لم أستطع ان اكمل الدكتور لاحظ إنني امسك الهاتف
على الأقل كنت اصدر بيان شجب واستنكار للطرف المعتدي 😀
تكتب ببساطة وعفوية تخدر بي
جميل جدا