عن عبقرية الإخوان وحتمية عودتهم ………
“6”
العربية الجيب كانت السبب فى القبض على جميع المشتبه فى انتمائهم للإخوان المسلمين وغلق جميع مقراتهم، وتوجهت قوة كبيرة وحاصرت المقر العام اللى كان فى الحلمية الجديدة وقبضت على كل اللى فيه، وابتدت الجماعة تنهار، والكل عارف ان النهاية قد أصبحت حتمية بسبب فجر الجماعة وعدم وجود خطوط حمراء تردعها………………..
الشيخ أحس بالوحدة والخوف، إلى درجة إنه طلع يجرى ورا اللورى اللى مقبوض فيه على الجماعة ومسك السلم ومصمم يطلع معاهم، الظابط قاله ماعندناش امر بالقبض عليك، عيط وصرخ وهو بيقول: لا تأخذوا هؤلاء بجريرتي فأنا أولى منهم بالاعتقال، و إذا كان الإخوان عصابة إجرامية فأنا رئيسها ! . .
وبعد ماكنت كلمة من البنا بتهز البلد ابتدى الجميع يتهرب منه، فى النهاية إضطر يلجأ لواحد مسيحى.!!!
اللى هو كريم ثابت المستشار الصحفى للملك، وطبعا المسيحى المصرى بيشتغل حمامة سلام بعد الضهر، دخل كريم بكل سماحة للملك فاروق يتوسط عنده للبنا، راح الملك مطلع له نتيجة والجماعة شالت منها صورة الملك وحطت مكانه صورة الشيخ حسن البنا، يعنى البنا هو ملك مصر القادم …………. فبهت الذى حاول التعريص.!!!
أحمد الخازندار قاضى شريف، حكم على شابين من الإخوان بالسجن كام سنة فى قضية إحراز قنبلة، الشيخ حسن البنا فى إجتماع مكتب الإرشاد قال: “ربنا يريحنا من الخازندار وأمثاله”…
عبد الرحمن السندى رئيس النظام الخاص اللى هو جيش الإخوان السرى سمع الجملة دى واعتبرها أمر من سيده المرشد بقتل القاضى الجليل.
22 مارس 48 القاضى خارج من بيته رايح يركب القطر ومعاه ملفات قضية تفجيرات السينما الشهيرة، إتنين ضربوه 9 رصاصات وقع قتيل ف الحال، لكن سكان حى حلوان جريوا وراهم ورغم إن المجرمين رموا عليهم قنبلة إلا انهم مسكوهم ف الآخر وقدموهم للشرطة اللى اكتشفت إنهم من أعضاء الجماعة، بعتوا جابوا البنا قال إنه مايعرفش” كالعادة ليسوا إخوانا وليسوا مسلمين”، بس النيابة إكتشفت إن المتهم الأول “حسن عبد الحافظ” هو السكرتير الشخصى للبنا نفسه، هنا انهار البنا واعترف إنه فعلا يعرفهم بس والمصحف ماأمرتهم بأى عمل إرهابى ضد شريعة جماعتنا الدعوية.!!!
تانى يوم الجماعة عملت اجتماع داخلى والبنا قال أنا ماأمرتش بالقتل، والسندى قال كلام الشيخ كان أمر غير مباشر ليا، وفى النهاية أصدرت الجماعة البيان التالى:
“أن الاخوان اللذان قاما بهذا العمل قد قاما بعمل غير مسبوق ,لكنهما لم يقصدا قتل المستشار أحمد الخازندار لذاته ,و انما قصدا قتل روح التبلد لدى هذة الجماعة من المثقفين و من ثم لا نكون اذاء قتل نفس بغير نفس”
فهمت حاجة من البيان؟ فهمت إستنكار للفعل أو حتى تأييد ليه؟ فهمت مين اللى أمر ومين اللى حرض ومين اللى نفذ؟ طب دم المستشار الشريف ف رقبة مين؟
عزيزى النائب العام الشهيد: دمك ياخويا راح هدر، لأننا شعب يكرر كل خطاياه حرفيا، ولا نتعظ.!!!
يمكنك دعم الموقع من هنا
مؤسسة ندى لحماية الفتيات
مافيش فايده فيهم يكذبون على قدر مايتنفسون
ما هو السبب الحقيقي وراء تدهور العلاقه بين الإخوان والقصر،وما سبب الضعف الذي وصلوا اليه بشكل مفاجئ.
قوة الإخوان فى ضعف الآخرين، تعرف ان كل كوادر اخوان مصر ربع مليون؟ وقيل 100 ألف، لكن عبد الرحمن السندى والجهاز السرى كان عامل ذعر للمنطقة كلها، خصوصا بعد انتشار التنظيم خارج مصر، وهنا استرجل الملك فاروق وقضى عليه………..
قبل فترة كنت اعتقد ان كل مسلمي مصر هم عرب. حاليا عرفت ان غالبيتهم هم من الاقباط الذين اسلم اسلافهم تحت ضغط الظروف الي صارت في الكم قرن الي راحوا. وبناء عليه: انتو اخوات وعيال راجل واحد، مسلمين ومسيحيين، ولازم تشوفوا لكم طريقة تحلوا بيها كل مشاكلكم البينية😊
المشكله ياعمنا أهدافهم غير اهدافنا وبرغم كل إلى شافوه منظمين وعندهم اصرار على تحقيق هدفهم عكسنا احنا أحفاد الفراعنه من كتر إلى حصل فينا اتشتننا
حبيبي يا مولانا دا انت مكشوف عنك الحجاب
ياسلام نفس الكلام المعسول مع تغير الزمان والمكان
آخر العنقود داعش والقاعدة الوسطيه شيخ الأزهر رفض تكفير داعش وقال إنهم أصحاب قبله ولا بجوز تكفير احدا مهما بلغت ذنوبة والأخر سعاتك قال
أنهم لا يمثلون الإسلام والإسلام براء منهم
طيب يا عموا هما تبع مين أعتقد يا ابي الكريم تبع مرتضي منصور!!!!!؟
مولانا انا اعتقد ان هذة التيارات في العالم عموما ومصر خصوصا ستتراجع بشده خلال العشر سنوات القادمه لان الممول الرئيسي توقف وتيار التنوير جارف وصوته يعلو يوم تلو يوم وان الاعتدال سيعرض نفسه وهي الحتمية التاريخية حسب ابن خلدون في تفسير نشوف وارتقاء الممالك