هيعوضك ، هانت ، قربت ، الرسالة دي ليك ، ربنا بيقولك ، إلخ…..

هيعوضك ، هانت ، قربت ، الرسالة دي ليك ، ربنا بيقولك ، إلخ.. كُل ده كلام فاضي وأوهام وتخدير وغير حقيقي بالمرة..
والإخوة المسيحيـين عاشقي الريتش بيكبروا صفحاتهم بالكلام الفاضي ده للأسف إللي واكل مع الناس البسيطة..

تعويض ربنا مش شرط يبقى مادي ، مش شرط يبقى على الأرض ممكن جدًا في السما ، مش لازم تخسر حاجة فتقعد تضيع عمرك على أمل مستني غيرها أو أحسن منها مش هو ده التعويض ، التعويض ممكن مثلًا انك تلاقي ربنا معاك في وسط كل ده مديك سلام وتعزية ، التعويض عمره ما كان مادة ، مش خسرت حبيب/حبيبة يبقى ربنا يعوضكوا بالأحسن ، أو خسرت فلوس تجيلك أكتر ، أو مشروع خسر فالتاني ينجح وهكذا.. كُل الحاجات دي ربنا مالوش دخل بيها أساسًا ، كلها أختياراتك أنت وأخطاءك أنت..

مافيش حاجة هتيجي بالساهل ، النجاح صعب أوي ومشواره طويل وممتع آه ربنا ليه دور طبعًا لكن حضرتك إللي بأيدك وبإرادتك كل شيء ، ربنا مديك القوة والعقل علشان تخطط وتعافر لأنه مديك الإرادة تعمل ، فرجاء محبة علشان الناس إللي مش فاهمة وقعدة مستنية الفرج والتعويض دي تُعثر في ربنا وتزعل منه بسبب شعارات وعبارات وهمية ، بلاش الكلام الفاضي ده يا حبايبي ، إعملوا إللي عليكوا وسيبوا ربنا يشتغل بطريقته ويعوضكم برضه بطريقته حسب مشيئته ..

أتمنى النوعية السخيفة دي من البوستات تختفي تمامًا والناس تنضج وتعقل وتعرف ربنا كويس ، مش ربنا بيقولك مش عارف إيه والقديس الفلاني بيقولك إيه دي سذاجة ربنا مايرضهاش على ولاده أبدًا ، وتعاملات الله مع البشر في كل عصر وكل زمن مُبهرة تفوق استيعاب العقول ، إلهنا حلو.❤️

#أبانوب_فوزي

يمكنك دعم الموقع من هنا
مؤسسة ندى لحماية الفتيات