كنت فى مطعم فلافل وعدس باكل فيه .. وانا مستنى الاوردر على ترابيزتى . جات سيدة خمسينية قعدت وندهت للجرسون فضلت تسأله على اسعار كل الاصناف وسكتت مطلبتش .. انا فهمت انه مش معاها يكمل فنويت اتدخل واطلب منها تيجى تاكل معايا …. ولكن سمعت الجرسون بيقولها بصوت منخفض ( انتى معاكى كام ) قالتله ( 9 ج ولله مش معايا غيرهم ) ….
قالها ( خليهم معاكى انا هجبلك اكل بعد متخلصيه تمشى على طول ومتسأليش حد على الحساب ) … وجالى الاوردر بتاعى فوانا باكل عدى عليا الجرسون ده . فندهتله طلبت مياه . ولما جالى سألته ( هو انت هتدفع للست دى ولا هتخليها تزوغ . انا ممكن بدل المخاطرة اساعد معاك ) .. قالى ( انا نزلتلها وجبتى انا ليا وجبة يوميا . ولكن بتصرف فيها واخد تمنها .. انا باجى الوردية واكل فبيتنا . واعتبرت النهاردا عادى وشكلها محتاج )
قولتله ( طيب اساعد معاك ) .. فقالى ( ياباشا عادى كله كلام ساهل وبسيط والناس لبعضها ومش 20 ج ال هتوقف الدنيا وتغنينا يعنى ) . فشكرته جدا وصافحنى ومشى .. ووانا خارج بحاسب سمعت جرسون زميله بيندهله بيقوله ( شوف تربيزة 7 يابيشوى ) .. والحقيقة اللى اسعدنى لما سمعت اسمه . انه الست كانت محجبة ولابسة خمار . والولد هنا تصرف بانسانية ومواطنة وتعايش ودون اى اعتبارات اخرى . ووالست خارجة شايف دعواتها للولد وامتنان نظرتها وشكرها
فعلا الشعب ده ملوش كتالوج ثابت تفهمه بيه … شعب تلاقى فيه حنية وقسوة .. طيبة ولئم .. تعايش تام وتمييز .. جدعنه ونداله .. فيه كل حاجة وعكسها .. بس تعرفوا .. يمكن التنوع ده سبب استمرارنا رغم كل اللى بنواجهه اقتصاديا وفكريا.
منقول مِن صفحة الأستاذ الكبير أحمد علام
Ahmed Allaam
يمكنك دعم الموقع من هنا
مؤسسة ندى لحماية الفتيات
موفق عظيم من انسان عظيم