“حكاية”
عارفين إيران؟
إيه مشكلتها مع العالم ومع دول الخليج؟
مشكلة إيران إنها عملت ثورة في 79، واستقلت بإرادتها، وطورت إقتصادها، وقواتها المسلحة، لدرجة إنها الآن بينها وبين القنبلة الذرية خطوة واحدة.
إيران لما قويت اقتصاديا وعسكريا, خرجت بره حدودها، وبقي لها أذرع في لبنان وسوريا واليمن والعراق، ومسيطرة علي ممر بحري هام جدا اللي هو مضيق هرمز.
لكن ولأن إيران وموقفها من دول الخليج بتقوم بدور يخدم الغرب ويسمحله بالتواجد والسيطرة علي منابع البترول، فكل ما يحدث معها هو مجرد مناوشات من بعيد، حتي تستمر في القيام بدورها.
هي دي حكاية مصر وثورة 52 وجمال عبد الناصر، اللي بيهاجمه النهاردة ناس هم في الحقيقة مش فاهمين حاجة.
مصر في 67 اتعرضت لمؤامرة دولية وسعودية خبيثة علشان ماتوصلش للي وصلتله إيران النهاردة.
كان كل هدف الغرب هو تدمير وإفشال الكولونيل اللي وقف قدامهم وتمرد عليهم وبدأ برنامج تصنيع عسكري مصري متقدم وناجح، بدأ من أول الستينيات، بعد تأميم القناة, ونمو الإقتصاد المصري بشكل هائل، البرنامج ده اعتمد علي معاونة علماء ألمان نجحت مصر تجيبهم بعد إنهيار المانيا في الحرب العالمية.
نجحت مصر في الوقت ده انها تنتج طائرة صاروخية كان إسمها (سوبر سونيك) تطير بضعف سرعة الصوت, وبدأت في صنع منظومة من الصواريخ بعيدة المدي كانت اوائل إرهاصاتها صواريخ القاهر والظافر.
البرنامج ده كان خطر علي مستقبل وأمن إسرائيل، ومستقبل الغرب ويبشر (من وجهة نظرهم) بنفس اللي بتعمله إيران النهاردة، خوفا إن مصر تقوي وتكبر وتمتد أذرعها العسكرية والسياسية لتهدد مصالح الغرب وأمريكا في نهب بترول الخليج وتحد من سلطتها في الدول العربية اللي استمرت فيها حتي بعد الإستقلال.
طيب يعملوا إيه؟
بدأوا حرب شرسة ضد مصر أخذت صور متنوعة منها الحرب المخابراتية بإغتيال العلماء الألمان وإجبارهم علي الرحيل من مصر.
وحرب نفسية موجهة للشعب المصري ذاته تفهمهم إن عبد الناصر متهور وهو الخطر وهو اللي لازم تواجهوه، وهو ده اللي مسيطر علي عقول البعض حتي الآن.
استدراج مصر (عن طريق السعودية) في حرب اليمن ووصل حجم القوات المصرية في اليمن لأكثر من نصف الجيش المصري، بتكاليف باهظة يومية.
وتصاعدت الحرب الي أن قامت حرب 67، وفي الدقائق الأولي وبخطة محكمة وضعت في بريطانيا، تم تدمير الطيران المصري والمطارات لشل حركة القوات الأرضية اللي ماخدتش فرصة القتال الحقيقي، وكانت نكسة 67.
مؤامرة مكتملة الجوانب كان الهدف منها إن مصر لا تخرج من الدائرة الضيقة اللي خططوها ليها ولسة مستمرة للآن، ساعدهم فيها كل القيادات اللي جات بعد عبد الناصر بإنصياعهم وتبعيتهم للغرب وأمريكا، ويستمر المخطط، علشان ما تبقاش زي إيران النهاردة.
طبعا المقارنة مع إيران غير منطقية لأننا دولة لا أطماع لها، لكن أنا حبيت فقط أقرب الصورة.
(إعادة نشر)
#بالعقل_والهداوة
يمكنك دعم الموقع من هنا
مؤسسة ندى لحماية الفتيات
