وجهة نظر قد تُقابل بالنقد والرفض والهجوم…..

وجهة نظر قد تُقابل بالنقد والرفض والهجوم..

أنا شماس، خادم، مُتدين و مُلتزم بنسبة كبيرة، فاهم و دارس إيماني و عقيدتي كويس جدًا، بعشق كنيستي..

بسمع ألحان، ترانيم، تواشيح، اِبتهالات، غناء بكُل أنواعه، بروح مسارح و سينمات، بحضر حفلات غنائية وشعرية، وكُل شيء له علاقة بالفن عمومًا..

مش معنى اني أكون بحب ربنا أو كوني رجل مُتدين و مُلتزم ده يخليني أكره الحياة و إللي فيها من جمال ومتعة ليس فيها أي شيء خطأ سوى أنها تجلب للإنسان الإنبساط والسعادة، هو ربنا ضد أننا نكون مبسوطين؟! ، هو ربنا خلقنا ليه لوحده (اِمتلاك) يعني؟! ، أنا هنا عايش على الأرض مش في الجنة.. قدامي حاجات كتير أعملها و بتشغلني و مش لازم على فكرة كُل لحظة أكون عايشها تبقى لربنا، ربنا ليه حق طبعًا و نفسي كمان ليها حق عليَّ و لازم جزء ترفيه و مرح و اِستمتاع بالحياة مش كبت هو و خنقة و خلاص! ، ربنا مش بيجبرنا عليه بالعافية، الطريقة دي بتكره الناس في ربنا و في الدين و في الحياة كلها، وعلى فكرة ربنا مدينا الحُرية و الأختيار كُل واحد براحته يعمل إللي هو عايزه طالما مش هيضر غيره، ربنا جميل يا جماعة و بيحب راحتنا و بيحترم رغبتنا و مشاعرنا و اِحتياجنا مش زي الصورة إللي أتصدر لكم غلط عنه، ربنا يعني الحُب و السعادة و الفرح ..

لما بحضر أو أشوف حفلات غناء مثلًا ع التيلفزيون و أشوف الناس مبسوطة و في حالة روقان و سلطنة و اِنبساط بالفن و جمال المواهب إللي ربنا خلقها فينا و جوانا، بقول جوايا حرام على أي رجل دين يحرم الجمال ده، ليه يعني يعكننوا ع الناس و يقرفوهم في عيشتهم ما يتهووا شوية هيجرى إيه خربت الدنيا، لا والله ما خربت؟! أنا شايف إن مفيهاش حاجة غلط إن حد محترم و جميل و متذوق للفنون يسمع أغنية حلوة أو يشوف مسرحية حلوة أو فيلم حلو.. نفسي أعرف إيه الغلط في كده؟! إيه سبب الحرمانية أصلًا؟!
فأي حد يحرم الفن إللي بيرتقي بالإنسان و بمشاعره و بيأثر فيه و يعيشه حالة تانية و في عالم آخر و يفصله من مود الحزن و الكآبة.. ده رجل دين جاهل و كاره نفسه أصلًا و محروم.. و إللي نفسه يعمله و مش عارف علشان ما ينزلش من نظر الناس و تسقط عنه صورة التدين الظاهرية.

بقول ده باِقتناع تام دي وجهة نظري و ده رأيي الشخصي و مش بمثل حد غير نفسي و فكري و بس، الحياة حلوة، عيشوا و اِستمتعوا و اِنبسطوا في أيامكم براحتكم انتوا مش بتعملوا الفواحش و العياذ بالله، و على رأي الست هو العمر إيه غير ليلة؟! ، شايف الأغاني و الفن حرام خلاص أبعد و ما تسمعش و ما تشوفش لكن مش من حقك تحرم ده على غيرك.. أنت مالك؟! .. أنت مين علشان تفتي و تحرم و تحلل على مزاجك و بناءً على فكرك الضيق إللي على قده أوي أوي، أنت حضرتك مش هتخلي الدنيا كلها تخضع ليك و لأفكارك المُتخلفة دي، أفكارك طبقها على نفسك و بس مش على غيرك، الوصايا اتلغت من زمان، هدانا الله و هداكم.

#أبانوب_فوزي

يمكنك دعم الموقع من هنا
مؤسسة ندى لحماية الفتيات