حضرتك كمواطن مصري قضيتك هي بلدك وبس ، ولازم بلدك دي تبقى بالنسبة لك كُل حاجة وأهم حاجة ، ومصلحتها وأمنها واستقرارها وسلامها تحُطهم فوق الجميع وفوق أي شعارات فارغة خسايرها أكتر بكتير جدًا من مكاسبها ، بالمناسبة حضرتك دمك لا فلسطيني ولا أوكراني أو غيره دمك مصري وبس ده إذا كان عندك يعني ، أي قضية في العالم آخرنا ندعمها كدولة دبلومسيًا وإنسانيًا ومعنويًا وماديًا فقط كإرسال أطقم طبية .. تبرع للإعمار .. إرسال طعام وشراب وغطاء للمتضررين إلخ .. ، لكن ندخل في صدام وحرب وتوتر علاقات مع أي دولة على شيء لا يخصنا ولا لينا دعوة بيه ده أكبر غلط ممكن بني آدم عاقل يرتكبه في حق وطنه ، احنا فينا إللي مكفينا يا جماعة ومش ناقصين مصايب ووجع قلب ودماغ ، ورجاء محبة يعني إذا كان في رزالة محدش يدخل اسم مصر في جملة مفيدة في أي مشكلة كانت ، في محاولات كتيرة أوي لتوريط مصر في حرب وصدام مع إسرائيل وكأن ده واجب عليها وحق ليهم وإن مصر رفعت إيديها وقالت نهدأ ونحكم عقلنا نلاقي ألف مين يزايد على مصر ومواقف مصر مع فلسطين في تاريخ نضالها ده كله ، إحنا ضد الظلم والعنف والإرهاب والأذى بكل أنواعه لأي إنسان لكن بحلول أكثر عقلانية ، إدينا فرحنا باللي عملوه المسلحين الفلسطينيين كام ساعة وراحوا ردوا الضربة أضعاف ومش هيسكتوا .. مين إللي تضرر في الاخر غير العزل الغلابة إللي لا حول ليهم ولا قوة؟! ، العقل يا جماعة كل حاجة لازم تبقى مدروسة كويسة جدًا لأن العواقب وخيمة لا تحتمل أو حتى تتوقع وربنا يعديها على خير ، الأيام دي في مؤامرة على مصر من الداخل والخارج لعودة الإنفلات الأمني والبلطجة في الشوارع زي أيام الثورة إللي قامت على الحرامي إللي منه لله ، والحدود لازم تتأمن كويس جدًا ، والبلد مش عارفة تلاقيها منين ولا منين ، فنهدأ كده بالله علشان مانلاقيش نفسنا احنا كمان بلا وطن ، ولو لقدر الله بقينا كده مش هنلاقي إللي يفتح لنا بابه ، خافوا على بلدكم يا جماعة دي أولى ليكم من أي حاجة تاني في الدنيا ، بلدك دي هي مستقبلك ومستقبل أهلك وعيالك ، وإللي الحماس قاتله أوي يروح يقاتل في أرضهم زي الرجالة وزي ما عملنا احنا في ٦ أكتوبر مش زي الجبناء الخسه إللي بيضربوا من الضهر العزل إللي معهماش سلاح ، السياحة هتضرب والاقتصاد هينهار والبلد هتغرق أكتر ، فخافوا على بلدكم احنا مش ناقصين يا جماعة ، والشعارات البراقة الفارغة دي مش بتأكل عيش دي نتايجها خراب مؤكد ، وعلى فكرة حماس دي مؤسسة إرهابية وضرت مصر كتير وكتير جدًا كمان وملت سينا بالإرهابيين ، فمحدش ملاك يعني بلاش تنخدعوا في حد ، مصر بلدنا أهم حاجة عندنا ، وإللي عايز يجاهد ويقف جمب إخواته يروح بلدهم يحارب هناك لكن في مصر لأ ، مصر دايمًا جيشها جيش حامي وليس معتدي وعمر ما حد هيخلينا نعتدي ونتحشر في حاجة لا تخص سياسة دولتنا العظيمة ، ربنا يعديها على خير ويحفظ مصر من كل شر ومن كل مؤامرة ، تحيا مصر للأبد.
#أبانوب_فوزي
يمكنك دعم الموقع من هنا
مؤسسة ندى لحماية الفتيات
رائع جداً جداً ربنا يحميكي يا بلادي
ربنا يحميك ويحافظ عليك
مقال فوق رائع وكل كلمة فيه صح اوي وكل انسان وطني يطبق كلام حضرتك لانه عين العقل وربنا يكثر من امثالك استاذ ابانوب الصحفي الرائع وكتاباته الرائعة دائما تحياتي لحضرتك