تُجار الدين المسيحي الحلوين بزيادة..
ربنا يزيد ويبارك.. عملوا كوافير تابع للكنيسة، وده يا أحبائي مُفيد جدًا لدخول السيدات للملكوت (وهذا هو البُعد الروحي الخفي في الموضوع)، وده طبعًا بعد البصمة المُباركة لشعر العروس السعيد، لكي يكون زواج مُبارك يُساعد في تقليل نسب المشاكل الزوجية فيما بعد، ولو هنبص للإيجابيات فده شيء جميل جدًا إن يبقى موجود كوافير جوه الكنيسة أو جمبها علشان مانضيعش وقت وأهو بدل ما أبونا يستنى العروسين بالنص ساعة وبالساعة ويتأخروا على الإكليل بسبب الكوافير لأ نكسب وقت ونخلي الكوافير جمبينا أحسن، دماغ عالية ومتكلفة بسم الصليب عليهم، وأنا الصغير بينهم بأقترح عليهم يكملوا جميلهم ويعملوا إستديو بالمرة مش هنخسر حاجة، وأهو برضه الكنيسة أولى، يعني تطلعوا عين الناس في مصاريف حجز الكنيسة للصلاة إللي وصلت بالآلاف دلوقتي، ودي كارثة ومصيبة وعيب وما يصحش البيزنس يدخل الكنيسة بأي شكل وبأي صورة، وفلوس الكوافير وفلوس الإستديو يعني أحلى سبوبة وربنا يعوضكم ويبارك حياتكم يا أولادي، كل ده علشان يصلوا نص ساعة وخلصنا.
إللي بيحصل ده مهزلة حقيقية ومنهج أحمق بعيد كل البُعد عن الروح والحياة المسيحية والكنسية الحقة، من إمتى إهتمامات الكنيسة بالهبل والقرف ده؟ ، لأ وشغالين إستثمار ومشروعات وتجارة ومباني والشعب يولع والفقراء والمحتاجين يولعوا عادي، الكنيسة مؤسسة روحية بحتة كل الأمور دي مش من إختصاصتها ودخيلة علينا، ملاحظ إن غياب وعي الإكليروس عن دورهم الحقيقي في البحث عن النفوس الضالة والبعيدة وإنشغالهم بتفاهات لا تنفع، لأ وقداسة البابا أطال الله عمره يعني عمري ما شفته بيهتم بأي شيء يخص الإيمان أو العقيدة أو أي شيء كنسي إلا الإستثمار والمشاريع وكل الكلام الفاضي ده، ده عيب وحرام إستغلال الناس كده، المسيح نفسه بيقولكم مجانًا أخذتم مجانًا أعطوا، كل إللي بتعملوه ده يا أبائي مالوش أي لازمة، ربنا مش هيسألكم عملتوا كام عمارة ولا كام مبنى ولا كام كوافير.. هيسألكم عن كام نفس ضلت بسببكم وكنتوا غير أمناء معاها، كل اللي بيتم هنا زائل ولا ليه أي تلاتين لازمة، أرجعوا للمسيح ومنهجه والدنيا هتبقى تمام وزي الفل، لكن لو مشيتوا بفكركم ومنهجكم الدنيا هتخرب والشعب هيُعثر ويسيب بيت ربنا بسببكم، حرام عليكم يا أبائي بجد..
إنتبهوا وفوقوا قبل فوات الآوان.. وربنا يحافظ على شعبه منكم ومن أعمالكم الشريرة.. اسف لو أسلوبي وحش وصعب وغير المُعتاد ولكن واجب عليا إيقظكم من غفلتكم.
#أبانوب_فوزي
يمكنك دعم الموقع من هنا
مؤسسة ندى لحماية الفتيات
كلامك صحيح وفى الصميم