الى عديمى الضمير الكذابين ومدعى الدين الذين يقولون “ببراءة” تشبه براءة الشيطان ” الحجاب حرية شخصية ” لكنهم يعرفون تماما ما تتعرض له الفتيات والنساء عندما يفكرون فى خلعه.. هذه حكاية فتاة اسمها رانيا تعرضت لضرب مبرح من شقيقها عندما خلعت الحجاب.. لكن الحمد لله ان النيابة اتخذت اجراء ضد الشقيق المعتدى.. خلوا عندكو شجاعة يابنات ويانساء مصر المحترمات.. خلوا عندكو شجاعة اشتكوا فى القسم حتى اقرب المقربين لكم.. فمن يضرب امرأة من اجل الحجاب او لاى سبب آخر فده مش راجل.. ده انسان جبان يتجبر على من هو اضعف منه…
و يرجعوا يقولوا الحجاب مش إجبار 😥
رانيا سوسن
gtS9ponsofhrted ·
أنا رانيا رشوان تعرضت لعنف أسري من اخويا تاني يوم رمضان. واختي Asmaa Rshwan رجلها مكسورة حاولت تقف له وتدافع عني ولما معرفتش صورت الفيديو.
بشكر كل الناس اللي ساعدتني وعملت شير والبنات الي رفعوا البوست ووصل لناس ساعدتني و قدموا دعم بشكل كبير ودا جاب نتيجة
بشكر Lamya Lotfey
من مؤسسة المرأة الجديدة – New Woman Foundation
و
Egyptian Public Prosecution النيابة العامة المصرية
تواصلت معانا بعد وقت قصير من نشر الفيديو و مسؤول جه خدوه امبارح القسم وهو مشي معاهم وانا واختي روحنا القسم الساعة عشرة امبارح الجمعة لأجل نطمن عليه وعملنا محضر ووصلنا الأمر النيابة وهناك انا اخترت الصلح بإرادتي و هو تعهد بعدم التعرض و يشوف علاج للتحكم في الغضب ويكسب نفسه ويكسبنا لأننا اخوات ملناش.
غير بعض ولو انا ضحية عنف هو ضحية مجتمع
وانا مكنتش متخيلة ان العنف الي بتعرض له انا واخواتي ممكن ينتهي لكن لما قررنا نتكلم ونعترض، جالنا الدعم من الناس والقانون قدم لنا الحماية.
فانا بنصح اي بنت او اي شخص بيتعرض للعنف يتكلم وهيلاقي صوته مسموع وناس تدعمه وقانون يساعده ويحميه.
وانا اخترت الصلح لاني محتاجة الأمان وعدم التعرض فقط، ونكون آمنين علي نفسنا بس أحنا ماكنش ينفع نسكت واكيد احنا زعلانيين عليه لأنه مش عارف يتحكم في غضبه هو طيب، بس هو كمان ضحية مجتمع بيقيس الرجولة بالضرب وب انت مغطي أهلك بكام متر قماش .
وانا اخترت استايل لبس مختلف عن الدارج في القرية استبدلت قماش الحجاب علي شعري بكاب.
(الصورة تحت)
انا بنت عايزة تكون نفسها وتعيش حياتها بالطريقة الي تناسبها اللي مش بتأذي بيها اي حد ومش بتفرض حاجه علي حد ودا مخالف لرتم القرية وفي اي مكان تاني دا طبيعي جداً.
بس للأسف احنا هنا بيئة كارهة للمختلف حتى لو كان مجرد رأي وكلامه غيرالسائد عن المجتمع مدعي الفضيلة الي بيسمح بزواج القاصرات وبيسمحوا ببيع بناتهم لشيوخ الخليج بمقابل مادي فيما يعرف (بزواج المتعة)
امبارح بليل جالي تهديدات بسبب المحضر الي عملته من قرايبي ( الي سرقوا ورث أمي و مايعرفوش عننا شئ) لو مالبستش علي هواهم داخل القرية هيضربوني بسكينة أو يجيبوا توكتوك او عربية تخبطني وانا رايحة الجامعة ( وخارج القرية براحتي هم مش ممانعين)
وفي المحيط بتاعي العنف اسلوب متبع وأصبح هو مقياس الرجولة وتحول الاخ من داعم وحامي لمعتدي، ومسموح للأخ بتعنيف اخته، لما اختي ياسمين دماغها اتفتح هما قالوا اي يعني اخوكي ضربك!
والحقيقة أن أسلوب الضرب و التعنيف بيتسبب في ضرر جسدي وأثر نفسي بيستمر لسنين طويلة و التخلص منه مش بسهولة وأنا عانيت من الأسلوب دا أنا وأخواتي ومتسبب لنا في ضرر نفسي حتي الآن.
بنصح اي بنت شافت او تعرضت لعنف أسري تتكلم ومتخفش وهتلاقي الدعم والحماية زي ما انا لقيتها .
0 Comments
يمكنك دعم الموقع من هنا
مؤسسة ندى لحماية الفتيات
اكبر غلط عملتيه هو التنازل عن حقك لان كل عيلتك عرفت اخرك كلمتين حلوين واقسم بالله انا مش عارف عملت كده ازاي
عندما يرفع الاخ يده ليضرب اخته تنكسر علاقه الاخوه والقرابه قبل ماتلمس يده القويه جسدها الضعيف
ياريت يكتب اقرار بعدم التعرض والمسؤليه الجنائيه اذا حصلك اي مكروه او حادثه
للأسف كلهم بيتنازلوا عن حقوقهم ويعملوا صلح في النيابة بعد كده.. ودا في حد ذاته خطأ كبير لإنه بيشجع آخرين على إنتهاج نفس المنهج لإنهم ضامنين إن معلش ومستقبله حيضيع ومكانش يقصد وساعتها المحضر يتقفل وكل حاجة تمام 😥😥
مذا حدث في مصر؟ فانا تركت البلد في ١٩٧٠، ولا كان احد يتدخل لابس ايه ولا مش لابس! وهل هذا الان للهي الناس من اللذي اهم من اللبس؟ فمثلا ما حال اولاد الشوارع؟. و اريد ان اعرف من المستفيد من هذه البلبلة؟ فاعداء مصر لا يشتغلون بالمفتوح، فبينهم و بين ما يبغون عدة مراحل، فعيب ان يقول المرء ان مصر مشغولة بتفاهات لبس المراءة، توجد اشياء اهم من ذلك،
فى ناس بتضطر تقفل صفحاتها لما تتعرض لها من سباب وشتائم بعد خلع. الحجاب