النيابة المصرية تفرج عن الصحفى بقناة الجزيرة ” أحمد النجدى” بعد اعتقاله 700 يوم.!!!
أولا مبروك يااحمد خروجك بالسلامة وفرحانين برجوعك لبيتك، ولكن لينا ملحوظتين:
الأولى هى سرعة الإفراج عنه والسيسى مازال فى مطار الدوحة، يعنى أمر الإفراج من الأمير تميم للسيسى ينفذ فورا وقبل وصول السيسى لمصر، حتى الراجل نفسه بيقول إنهم كانوا مستعجلين جدا لخروجه، وعيب أوى تفرج عن معتقل بعد ماتقبض شوالين رز من قطر.!!!
الملحوظة التانية الأهم هى رعب الراجل وعدم تصديقه إنه خرج من معتقل جوانتانامو المصرى، وبيقول الناس كانت لطيفة جدا وماحدش اتعرض لى ولا شتمنى أو عذبنى، ودة نفس الكلام اللى قلته أنا أول ماخرجت بعد 222 يوم بس، ودة نتاج رعب مش حقيقة.
الحقيقة انك مهان وانت مسجون بدون قضية، مهان وانت مرمى ف علبة سردين مش قادر تتنفس جواها، مهان وانت بتترمى ف عربية ترحيلات مميتة من كتر أعداد المعتقلين اللى فيها، مهان لأنك بتروح المحكمة بتترمى ع الأرض تحت رجلين ظابط وأمين شرطة قاعدين ع الكراسى ورجليهم فوق دماغك، مهان وامك وبنتك ومراتك واقفين بعيد بيبكوا والبيه الظابط مانعهم يقربوا حتى يسلموا عليك، مهان وانت بتدفع دم قلبك وتصرف ع العسكرى والظابط والمأمور عشان بس يعاملوك بآدمية، مهان وانت بيتخرب بيتك وتترفد من شغلك وعيالك يجيلهم ذعر أبدى من السجن، مهان لأن عيالك وعيال اخواتك ممنوع يدخلوا فى أى منصب سيادى مهما كانت كفائتهم، مهان وانت مش عارف تهمتك ايه ولا هاتخرج إمتى ولا هاتعيش لحد ماترجع لأهلك ولا هاتموت زى غيرك، مهان أخيرا لأنك لما هاتخرج عمرك ماهاتقدر ترجع إنسان سوى تانى.!!!
احنا شربنا كاس المهانة حتى الثمالة، بس السكينة سارقانا.!!!
يمكنك دعم الموقع من هنا
مؤسسة ندى لحماية الفتيات
دا كلام لما يتم تداوله فى اى صحيفة بربع جنيه غربية او شرقية، لا يمكن تتكلم ساعتها ان اى استثمار يا حاج بلحة يا حقير،، وانى الموضوع كل يوم من سئ لأسوأ واللى بيحصل فى مصر ده من انتهاك كل القيم والاخلاق اخرته سوده ع الجميع.
ربنا مايوريك كم الدمار النفسى والمادى اللى بتتعرض له أسر المعتقلين، إمبارح بس مرات معتقل كان معايا بتكلمنى، هو جوزها كان واخد الدكتوراه من ألمانيا واتقبض عليه ف المطار، ودلوقتى داخل فى تلات سنين، والأسرة تقريبا اتدمرت معنويا وماديا لدرجة إن الست وهى هانم محترمة بتطلب شغلانة ولو طباخة ف أى بيت محترم عشان تعرف تأكل العيال اللى حولتهم من مدارس خاصة لمدارس حكومية، وبرضه مش عارفين يعيشوا……………..!!!
كلامك اوفى لا يحتاج الى التعليق .. فقط نتمنى لكم الصحة والسلامة