تم إيقاف صاحب قناة رؤيا فارس الصايغ والإعلامي محمد الخالدي على خلفية فيديو نشروه يجسد معاناة عمّال المياومة، حيث اعتبرته السلطات "تحريض" على كسر التدابير والقوانين إللي ماخديتها الحكومة لمنع تفشي زفت الطين إللي أجانا على غفلة..
قناة رؤيا لم تمارس بنظري أي تحريض هي فقط وصّلت صوت المتضرر الأكبر من حظر التجول والعزل والتدابير؛ عمال المياومة إللي رزقهم بيجي يوم بيومه… لهذا انا بشكل واضح وصريح ضد إيقافهم ومع الإفراج عنهم فورًا.
لكن شو الحل برأيكم؟؟ الحل نفتح كل إشي؟؟ السويد لما تركت كل إشي مفتوح تركته عشان الشعب السويدي عنده وضع خاص؛ مش كثير اجتماعيين حريصين فش بينهم تلامس وعددهم قليل نسبة لمساحة البلد "مافي كثافة سكانية عالية".. احنا عنا كثافة سكانية عالية وعادات اجتماعية تعتبر بيئة حاضنة للفايروس..
طب شو الحل؟؟
الحل هو الحكومة تعطي رواتب مؤقتة لهدول الناس لحد ما تخلص هالأزمة، بعرف قديش هالشي ممكن يشكل ضغط على الخزينة بس مافي ولا دولة رح تطلع خزينتها مرتاحة.. أزمة وسخة وبدنا نتخطاها.. بس تخلص بنشوف كيف نعوض العجز..
أعطوا الناس المحتاجة رواتب مؤقتة لحين انتهاء الأزمة، عشان هذا الحل الوحيد المتاح في دولة الكثافة السكانية فيها عالية وعندها عادات إجتماعية مليئة بالبوس والاحضان.
للأسف طلب صعب ورح يهز الخزينة بس هذا هو الحل الوحيد.. عشان إذا تفشى المرض صدقوني الموضوع حيكون أكبر من مجرد هزّة.
وبالنهاية لازم الناس تفهم شغلة، هالأزمة إللي عايشين فيها مش بسبب الحكومة… بسبب الكورونا، والحكومات في كثير من الحالات جد فش عندهم كثير خيارات.
نيكولاس خوري | ناقد سياسي ساخر
