كريم حبيب
النهاردة يبقى فاترا جواز سفر ٣ سنين عشرين أزمة خمسين خناقة .. ومليون شكراً .. وانا آسف .. حقك عليا .. مليون بحبك .. وكل بحبك جديدة أصدق و أدفى أكبر من اللي قبلها
الواحد مبيعرفش قيمة مراته غير لما بيقع .. لما بيتعب ويلاقيها شايلاه في عنيها .. ظبطة المنبه علي مواعيد الدوا .. والسهر و القلق
كل يوم الراجل بيرقده في السرير بسبب عملية أو تعب مفاجئ نص علاجه في الست اللي معاه ..
منساش كل مرة كانت تمسك إيدي و انا بمر بأي نوبة الساعة إتنين بالليل من غير مقدمات ..
أوقات القئ اللي مبقدرش أتحكم فيه .. عصبيتي .. و أيام إكتئابي الطويلة .. مكنتش هقدر أعدي من كل ده لواحدي
بعد الجواز الواحد بيحس بمشاعر أهم و أجمل ألف مرة من الحب
مشاعر الإمتنان .. الشكر .. الشكر علي كل حاجة هي بتعملها عشاني .. اللقمة الهنية .. و اللبس المغسول المكوى .. الكلام الحلو والإبتسامة اللي بصحى عليها .. حبها لأهلى .. كل مجهود مبذول في سبيل سعادتي مهما كان صغير .. يستحق الشكر
أول ما إتقدمتلها قولتلها انا عصبي جداً .. بس هحاول أسيطر على ردود أفعالي .. بدخن بس هبطل الوقت .. وبكتئب ١٢ شهر في السنة وساعات بصحى مايز يطلب منى أي حاجة
والنهاردة الحمد لله بقيت أهدى بكتير جداً و بطلت سجاير بتعافى من الإكتئاب وبقيت بصحى من النوم أجيب طلبات البيت و أتعامل مع الناس و كسرت حواجز عمري ما كنت أتخيل إني أكسرها. الفضل لله أولاه رزقنى بيكي
شكراً عشان صبرتي عليا .. شكراً عشان إتحملتيني في أوقات كنت فيها عباره عن " عيوب " بس.
أشهد الله أني ما رأيت منك إلا ما أسرنى .. و أسعد قلبي .. و أنار حياتي.
