#قصةنجاح
زينب الحيدري
•اسمي زينب عمري ٣٠ سنة من بغداد
•مصورة فوتوغرافية
•كانت مهنة التصوير مجرد هواية منذ ان كنت صغيره احب الكامرات والصور..كان عندي كامرا ام الفلم بالبيت ودايما اصور بيها واول مره لزمت كامرا فيديو وصورت كان بعرس اختي..
حسيت روحي فرحانه باللي سويته وبعدها بديت اطور من نفسي واشتغلت باكثر من استوديو حته اتعلم
كنت اشتغل الصبح بمكان والعصر بمكان حته اكتسب خبره اكثر..
الى ان تمكنت وفتحت استوديو خاص بيه كان بالنسبه الي حلم والحمد الله.
*هل واجهتك صعوبات في بداية مشروعك ؟؟
•واجهت عديد من الصعوبات واكيد اي مشروع يواجهنا بي عدد من صعوبات ماانتظرت من احد ياخذ بايدي ويساعدني وحدي تعبت وتحملت كل الصعوبات حته لا فد يوم احد يكول احنه سويناج
الحمد لله والشكر خلال فتره قصيره الاستوديو صار معروف والمنطقه اغلبها تجي يمي لان يرتاحون لما تكون بنيه التصور..
تركت الاستوديو بسبب امور عائليه لكن.. ماتركت هوايتي ابد..رجعت اشتغل بس مو بالاستوديو..صار عندي بيج وكمت اصور جلسات خارجيه على الطبيعه
عرسان واطفال ومودل والخ ..
*هل واجهتك قصص مميزة خلال التصوير ؟؟
• مواقف كثيرة منها اللي تضحك ومنها اللي تبكي..
مثلا كنت اصور العروسه هي ودتودع اهلهه اكوم ابچي وياهم ???? والدموع تسيل واني اصلا ماعرفها..
ومره صار موقف خلاني اضحك طلعت اصور زفه للعرسان وطول الطريق ادك هورنات وياهم حسيت روحي كرايبهم..يعني تمر عليها ايام حلوة تبقى بالذاكرة..
*كلمة منك توجهيها للنساء ؟؟
•احب اشجعهم واكلهم ماكو شي صعب ابد كلشي بالممارسه يصير سهل..بالنهايه احب اكول
لكل شخص عنده حلم ويشوف صعب تحقيقه
ابد ماكو شي صعب ماطول الاراده موجوده
والله يگول ياعبدي اسعى واني اعينك
واسفة على الاطالة.
كل التوفيق ان شاء الله واللي يحب يتابع عمل زينب عبر الرابط الفيسبوك والانستا ..
https://www.facebook.com/Zainab-photographer-1372896426133100/
https://instagram.com/zainab_photo89?igshid=1h8wo0xannplo
#حقوق_المرأةالعراقية
#IWRO
#Sara
