كتّاب

صديقى بيتهمنى إنى مابحبش الستات؟ أنا ؟ دة أنا عاشق الستات…

صديقى بيتهمنى إنى مابحبش الستات؟ أنا ؟ دة أنا عاشق الستات…


صديقى بيتهمنى إنى مابحبش الستات؟ أنا ؟ دة أنا عاشق الستات بكل أنواعها، والدنيا تبقى خرابة لو عينينا مش هاتتمتع بجمال ودلال ولطف ودلع الستات، صحيح أنا مابحبش النسوان وبقرف منهم، وخصوصا لما تقلع ” الحردة” اللى على شعرها وتشم ريحة الكمكمة، وتدور على قملاية سارحة، وحتى لو تغاضيت عن لبس الخدامين دة ودخلت تحميها وتفليها، برضه هتلاقى ريحة زناخة طافحة من جلدها، مش عارفين إن القصور الملكية زمان كانت بتطهر الجسم بالعطور والزيوت الفواحة يوميا لمدة تلات شهور قبل ماتقدمها لجلالة الملك، عشان حتى لو عرقت تعرق مسك وعنبر وريحان، مش روايح كمكمة.!!!
طب هو صديقى ليه بيتهمنى الإتهام البشع دة؟ لأنه لازق فى صفحات الستات الحلوة، وكل ماتكتب بوست يخش يقول لها دة ايه الحكمة والعبقرية دى، أنا حاسس إنك أم نيتشة، ولو قالت نكتة غبية يملا السطور هاها، ويقولها والمصحف ولا اسماعيل يس، وكل شوية يعرض خدماته: أنا طبيب ومعايا الجنسية الأمريكانية وبقبض بالدولار، مافيش أى واحدة فيكم عايزة حاجة من أمريكا قبل مانزل أجازة؟ بجد والله، أنا صحيح مسيحى بس كريم، أى أوامر ياهانم؟ وانتى يا مدموزيل؟
يا دكتور عادل يا صديقى الكلام دة ماينفعش ع العام، وماينفعش يتعرض للكل، ركز فى تلاتين أربعين أنثى بس كفاية عليك، وبعدين هاتعمل ايه بالنسوان دى أصلا وانت بتخاف من مراتك وماتقدرش تخش الحمام إلا لما تستأذن؟ عايز تقول لى انك هاتروح تسلم الهدايا؟ طب ورب الكعبة ماتقدر، كبيرك ” بؤ” ف الكومنت بتاعك والسلامو عليكو……….
عادى يا حبيبى إن كل المتجوزين بيخافوا من نسوانهم، هى بس بتسيبك تسترجل ع الصفحة وتفضل تحلف بالطلاق: أنا راجل، أنا راجل، والمصحف أنا راجل ولازق ف صفحات النسوان والستات والرينبو كمان، وبحوش كل سنة 100 ألف دولار المدام بتشيلهم فى مكان أمين، صحيح بقالى تلاتين سنة ماشفتش أمين دة ولا مرة، بس مش مشكلة، أنا راجل ولما أكبر هاقولها هاتى الفلوس شقا عمرى عشان أنا راجل وليا كلمة………..مش كدة يا شومان؟ تفتكر هاترضى تدينى شقا عمرى ولا هاجى أقعد ف ريحك نكتب مذكراتنا؟ طب مش انا راجل برضه؟
سيد الرجالة يا دكتور، بس تعالى من الساحل وهات الشواية والفودكا واللحمة وتعالى أقولك هانعمل ايه، لأ مش هانخطف بنتك ونهدد مراتك، إحنا هانخطفك ونطلب فدية…………..


يمكنك دعم الموقع من هنا
مؤسسة ندى لحماية الفتيات

اترك رد

زر الذهاب إلى الأعلى