طيب لنفرض جدلا إنه بيلجيتس حيوان وفش كورونا وعم بضحك علينا وبده يخوفنا عشان يبيعنا لقاح فيه شريحة صغيرة ويشبكنا كلنا على ال5G مع إنه إحنا ALREADY مشبوكين بشي اسمه SMART PHONES بس ماشي لنفرض جدلا كلامكم صح..
ال 320 ألف إللي ماتوا هدول شو؟؟ رح تحكولي ماتوا عادي لعدة أسباب وحطوهم وفيات كورونا عشان المسرحية تكمل.. حلووو حلووو كثير، هذا الإشي مستحيل يصير إلا إذا كل حكومات العالم بتشتغل مع بلجيتس المجرم من تحت لتحت، ولا ليش الحكومات بدها تسجل وفيات كورونا وفش كورونا؟؟؟ عبيطة الحكومات؟؟ يعني في 195 حكومة شغالة مع بلجيتس السفاح..
طب الدكاترة؟؟ يعني واحد مات بسبب القلب والحكومة سجلته كورونا الطبيب مش رح يطلع يحكي أو يعترض؟؟ عم بداوم كل يوم على أساس كورونا وبشوفش كورونا وعادي؟؟ هذا الإشي بيعني واحد من تنين: يا إما الحكومات قامعة الكادر الطبي وهاي مستحيلة عشان في دول بتقدرش تقمع، يا إما الدكاترة شغالين مع بيلجيتس المتوحش من تحت لتحت زي الحكومات.. يعني في 195 حكومة و 10 مليون طبيب شغالين مع بيلجيتس الإرهابي…
أكمل؟؟ ولا وصلت؟؟
لا شك إنه دول العالم قذرة ولا شك إنه أثرياء العالم صاروا أثرياء بطرق ملتوية ولا شك إنه شركات الأدوية عبارة عن مافيات… بس خليك متذكر إنه عندك دماغ، غربل فيه أي معلومة قبل ما تنشرها.
نيكولاس خوري | ناقد سياسي ساخر
