من التاريخ المخفى ……………………
كنا فى شتاء سنة 1977 ، وكان رغيف العيش بتعريفة، وتقف تنقى العيش، واللى يفضل بيسموه رجوع التلاتة بقرش، وقرص الطعمية بتعريفة، وشقة وطعمية بقرش، يعنى نص رغيف فيه قرص طعمية وسلاطة، والسيجارة السنسون بتعريفة، والكليوباترة العلبة ب 16 قرش ونص، وكيلو اللحمة ف البندر ب 90 قرش، وعندنا رطل اللحمة ب 35 قرش، والبيضة بقرش والست بيضات بشلن، وكف الحمصية أو السمسية أو صباع الملبن ب قرش، وبتعريفة شاى وبتعريفة سكر تعزم خمسة من أصحابك على خمس كبايات شاى معتبر، وام نبوت أشهر عاهرة فى القرية أجرتها تعريفة، صحيح هى عندها ييجى سبعين سنة بس مازالت مصرة على المضى على الدرب المقدس، هى بتبيع ترمس على شط الترعة، تروح تديها تعريفة تديك قرطاس ترمس، ولو غمزتلها بعينك تسيب القفص وتشدك تنزل بيك ف بطن الترعة وتاخد خلت أم نبوت ذات نفسها بدل قرطاس الترمس، كانت أيام بركة والله، وراحت أم نبوت وراحت معاها البركة………….
وفجأة الحكومة ترفع سعر رغيف العيش من تعريفة لقرش، والشاى والسكر و35 سلعة أساسية، الناس تتخص، تنزل مظاهرات فى الشوارع يوم 17 يناير تهتف ” سيد بيه ياسيد بيه، كيلو اللحمة بقى بجنيه”……….. ” هو بيلبس آخر موضة واحنا بنسكن عشرة ف أوضة”، والمظاهرات تمتد من اسكندرية لأسوان ويحرقوا أقسام البوليس ومديرية أمن القاهرة واستراحات الريس، وفى القاهرة يكسروا كباريهات ومحلات شارع الهرم ويسرقوا اللى فيها، وتنزل الجرايد تانى يوم الحكومة بتتراجع عن رفع الأسعار، والسادات يوصف اللى حصل بأنه ” إنتفاضة الحرامية”……….
بعد مجهود أعرف أتصل بالأستاذ عمر عطية مدير مدينة الطالبات ف الجيزة وبلدياتى، وينادى لى أختى المقيمة فى المدينة، خير يااختى إيه اللى بيحصل عندكوا؟ إحنا ممنوعين من النزول بس الشوارع مليانة ثوار وبيقولوا إنها إنتفاضة للحرامية.!!!
الجيش ينزل ويقبض على الآلاف والدنيا تهدى شوية، وكلنا نبقى عارفين إسمها ” إنتفاضة الحرامية، ويتحول 176 متهم لمحكمة أمن الدولة العليا، ويكون رئيسها المستشار حكيم منير صليب، وتكون المفاجأة إنه يطلع جميع المتهمين براءة، ويتهم حكومة السادات بأنها السبب، ويرفض تسمية إنتفاضة الحرامية، ويسميها ” إنتفاضة الخبز”، ومن يومها واحنا بنقول عليها إنتفاضة الخبز………
لما راجل واحد شريف من السكان الأصليين يغير بموقف نبيل من تاريخ بلد………………
الله يرحم المستشار صليب، ويرحم الشعب المصرى اللى عايش ميت …………………….
يمكنك دعم الموقع من هنا
مؤسسة ندى لحماية الفتيات
يوم ١٨ يناير ١٩٧٧ جريت جرى من الكلية فى العباسية حتى ميدان رمسيس و شميت كمية غاز مسيل للدموع يكفينى لأخر العمر
لطالما كانوا و كنا شركاء فى الوطن
نعانى ما يعانون
ونحزن لما يحزنهم
حكم عدل من أنسان عادل
ايام المؤسسات
لوالايام دى كانوا بقوا حراميه وابسوا ميت قضيه حكمهامؤبدعلى الاقل ..قضائنا الشاخخ
اللى عملة الشعب ده هو اللى هيحصل قريب من الغلا و هيبقى اكتر من كده كمان تحياتى لشخصك يا جنرال
اهو تراجع السادات في الوقت دا لبسنا في عك لغاية دلوقتي
لما كان فى قضاء مستقل
لكن الفتره اللي بتحكي فيها كانت البلد في فقر رهيب و في ناس كان حالها معدم حتي مستوي المعيشه كان هباب يمكن الحاجه غاليه صح لكن نسبه الغني اصبحت اكتر و العيشه اصبحت افضل علي الاقل مفيش بيت مفيهوش كهربا او مياه نبكي علي الماضي ليس من حيث المعيشه بل بالناس اللي عاشت الفتره ديه كانو ناس طيبين سعدا بابسط شي ده هوه اللي افتقدناه من الزمن ده
طاب وايه كان مصيره بعد كدا
كنت في الفتره دي في جامعة القاهره وكان مسموح بالمظاهرات والوقفات الاحتجاجيه داخل الجامعه مع عدم الخروج خارجها حتي الطلبه الايرانيين بعيملوا مظاهراتهم ضد الشاه …عموما انا اترحم علي هذه الايام وايضا علي القاضي الجليل وشجاعته
نحن الآن في أحوج الي انتفاضه حراميه خبز اي مسمي
عارف هتزعل مني 😓
– وكثيرون – ولكنها كلمه حق يجب ان تقال …
هذه القرارات كانت بدايه إصلاح إقتصادى لميزانيه الدوله ، ولو كانت الحكومه قويه بما يكفى لتمريرها ، لكان الوضع الآن أفضل بكثير …
لكن التيار كان عالي ، والشيوعيين والماركسيين والناصريين ركبوا الموجه ، وتراجعت الحكومه عن قراراتها …
وعندما جاء مبارك للحكم ، ظلت هذه الإنتفاضه فى مخيلته …
فتضاعفت أعباء الدعم أضعافا مضاعفه …
ولك الله يامصر …
كانت ايام بركه كنا نروح نجيب قرطاس السكر يديني بداله قرطاس لب عباد الشمس
ام نبوت راحت وخدت معاها البركه 🤣🤣
فظيع يا مولانا الشومان…..عظيم بيمين
الا بجد ياعرب
سيبك من أهمية الموضوع وجمال الطرح،ممكن نمرة أم نبوت من فضلك😅
من يزمها مصر شايلة الهم يامولانا
للاسف معنديش اى تعاطف مع حد نازل يتظاهر عشان يعلن اعتراضة ويطمح فى حياة افضل ، يقوم يخرب ويحرق ويسرق ، النتيجة سلبية اكيد زى نكسة يناير بالضبط.
الاشتراكية فشلت فى عقر دارها على الجميع ادراك تلك الحقيقة ،
القمح والزيوت والبقوليات وغيرها سلع نقدية تخصع للعرض والطلب وسعرها متغير طبقا لظروف الانتاج ، وتتحكم فيها عوامل مثل الطقس و الحروب كما حدث فى اوكرانيا حاليا
الحكومات ليس لديها عصا سحرية حتى تتحكم فى الاسعار والتكاليف حتى توفر السلع باسعار ليس لها علاقة بالواقع.
دائما هذا البلد ملىء بالشرفاء وغالبا يكونوا من اقباط مصر تحيه لملح البلد واهلها ❤وحضرتك
والسادات سابه كدا ولا حدد إقامته
أصل السادات نابه أزرق 😄😄
لا تنسى يا عزيزى ان تعداد سكان مصر فى ذاك الوقت ٤٠ مليون نسمة
عشان كنا رجاله ووقفنا وقفه رجاله بصوت محمود المليجي
نشكر الله ان في هذا اليوم كان القاضي مصري قالب وقالبا وعليه تم اخراج الجميع ولكن للحقيقة انها نفس الاسعار ولكن امام كل الارقام نقطة زيادة فقط وجرب كدة .
الله يرحمه ويقدس روحه له منّي ومن شعبنا السلام علي روحه الطاهرة .
هى دى كان إسمها زوبعة فى فنجان ؟
حيرتني
انت مجاش فى بالك حاجة مهمة ياشومان ان كل الى حصل فى القضاء كان مسرحية وهم متفقون عليها لتهدئة الاجواء لان الحكم عليهم باى حكم كان هيشعل الموقف … واضح انك عايز تبقى محنك شوية ههههههههه
من أنبل رجال القضاء
الغريب اني بحس انك عايش في الحكاية اللي بتحكيها وكانها بتحصل قدامك دلوقتي… رائع يامولانا
فكرتنا بأيام حلوة الله يسامحك الواحد كان نسي او تناسي
طبعا عشنا تلك الظروف والاحداث ساعه بساعه، وكانت انتفاضه حقيقيه لأجل غلاء اامعيشه وتراجع السادات عن رفع الاسعار بعد ان وصل الغليان فى الشارع الى قمته وكان كثيرين من اعضاء حزب التجمع مدانين رغم ان الانتفاضه كانت عفويه و لم تكن منظمه لكنها اجبرت الدوله لتتراجع عن رفع الاسعار و جاء حكم (المستشار حكيم منير صليب) بمثابة قلم على قفا الحكام، وهنا اهنئك على انك متذكر الشعارات التى هتف بها الشعب ضد الغلاء
يعني يارب مولانا تفكرنا بأيام مرت بنا وكنت وقتها ابلغ خمسه عشر عام وشاركت بطريق الصدفه واهم حاجه عندك ام نبوت هههه 😂هو مش نبوت هوه حاجه تانيه المهم المستشار المحترم ابن البلد اللي وقف وقفه رجاله هوه المصري الأصيل وانت احلي حآجه عملها النت عرفنا بحضرتك