تانى يوم الحفلة عبد الحليم يروح معهد الموسيقى يقابلوه من ع الباب: الأستاذ عبد الوهاب إتصل بيك، عبد الوهاب شخصيا؟ عبد الوهاب جبل التوباد، وسجى الليل، وفى الليل لما خلى، ومين عذبك بتخلصه منى، أنا هاقف أدام الجبل دة؟
ولكن كل الأصوات بتحذر حليم: خلى بالك من عبد الوهاب، مابيرحمش، والمطرب جلال حرب اللى دمره، دة زى التعبان يفضل يشكر فيك وف كل خطاياك قبل مزاياك لحد ماتقع ف الفخ، ويبلعك وتبقى ظل ليه، بس مش حليم، حليم معاه نخبة من أقوى عقول مصر، يتصل بصديقه إحسان عبد القدوس، قال له انت وكمال الطويل ليكم طريق غير طريق عبد الوهاب، هو هاياخد أحسن مافيكم وفى النهاية هاتبقوا نسخة مشوهة منه، إمشوا طريقكم بعيد عن عبد الوهاب، عبد الحليم إتحمس وقال له جايز أنا نقطة وعبد الوهاب جبل، بس مش هامشى وراه.!!!
ترحيب حار من عبد الوهاب بحليم والموجى، ويطلب منه يغنى، حليم يغنى كام أغنية ليه، يطلب منه يغنى أغنية لعبد الوهاب، ويبدأ حليم يغنى وفجأة يبكى عبد الوهاب، خير يا أستاذ؟ قال له أول مرة أسمع واحد بيغنى أغنياتى من غير مايقلدنى، إنت شخصية غنائية جديدة…………..
يطلب منه الأستاذ يلف حوالين نفسه، ويقول له: إنت شاب رقيق تصلح للسينما، بكرة تمضى العقد.!!!
عبد الحليم مذهول بس عارف قيمة عبد الوهاب المتربع على عرش الأغنية العربية لمدة تلاتين سنة، بس عارف إنه عقرب بيلدغ أى منافس، ويجره ف سكته لحد مايدمره، هما بيقولوا كدة على استحياء، لأن فترة الخمسينات والستينات كلها أسرار وماحدش بيكشفها لنا إحنا الجمهور إلا بالصدفة.
الموجى بيقول ل حليم: الراجل دة هايخطفك منا، بس الموجى مش عارف لسة عقل عبد الحليم ومدى ذكائه.
تانى يوم يروح حليم يلاقى عقد إحتكار من شركة الأسطوانات لمدة عامين تنتج فيهم فيلمين لحليم والعقد بمبلغ 200 جنيه، ماشى………
طب من حق الشركة إنها هى اللى تختار كلمات الأغانى، يرفض حليم كلمات الأغانى هو بس اللى يختارها، ويوافق عبد الوهاب.
شرط تانى عبد الوهاب بس هو اللى يلحن كل أغانى الأفلام، برضه يرفض حليم ويطلب الطويل والموجى، ويوافق عبد الوهاب.
هنا عبد الحليم بيقول لنا إن الأستاذ عبد الوهاب شخص مش نضيف، عايز يدمر المطرب الصاعد، لو ماعرفش عن طريق العقد، يبقى مش هاينفذ العقد ويعطله سنتين، والحقيقة إحنا ماكناش عارفين الأستاذ عبد الوهاب بكل هذا التدنى، مع إن المذكرات دى ظهرت سنة 74 وماحدش كذبها.
بقى كلنا مخدوعين فيك يا عبد الوهاب كل دة؟…………………………
وفعلا عبد الوهاب يركن العقد والشركة ماتنتجش الفيلمين لحليم، وحليم بيقول لنا إنه غنى صافينى مرة اللى لفتت الأنظار لصوته، ورجع غنى على قد الشوق اللى عملت منه نجم واسم فى عالم الطرب…………….. وتبدأ مسيرة النجاح.!!!
يمكنك دعم الموقع من هنا
مؤسسة ندى لحماية الفتيات
ياخبر ابيض صدمت في الراجل ده لكن اعتقد ةن حليم بذكاء عرف يخرج من دايرته
عبد التواب كان بيدخل الكنيسه ويسمع الالحان القبطيه ويعمل منها الحان اغانيه .
يقال إن عبد الوهاب فعلاً ركن عبد الحليم و ماتحركش إلا بعد نجاح على قد الشوق و لولا كدة كان اتدفن عبد الحليم
عبد الوهاب حرامي الحان معروفه يعني ده فيه اغاني واخدها نقل بالمسطره حتي مفكرش يغير فيها نوته واحده و كان معتمد علي ان الجمهور الشرقي و المصري مش متطلع علي الاغاني الغربية …طبيعي يطلع منه اي حاجه و كل حاجه
الرحابنه سرقوا أضعاف ما سرق عبد الوهاب
انت شجاع يااستاذ شومان انك بتفتح الملفات دى