الصورة دي تقريبًا كانت مِن حوالي سنتين أو أكتر، كُنت قاعد وقتها على كافيه في إسكندرية مع الأساتذة الكبار دول، النجم الكبير الأستاذ أيمن أمير والسيناريست الكبير الأستاذ ماهر فريد نيقولا، ساعتها عرفت إن في فيلم بيتحضر له عن سمو الرهبنة ونظام حياة الشرِكة الرهبنية، وهيقوم ببطولته وتجسيد شخصية الأنبا تادرس تلميذ العظيم الأنبا باخوميوس أب الشرِكة هو الأستاذ الفنان أيمن أمير، فاكر إني فرحت جدًا جدًا وقتها لأن الفكرة جديدة ومُختلفة وعجبتني جدًا وكُنت واثق أنها هتطلع بشكل إحترافي خاصةً لأن مُخرج العمل مُخرج كبير ومُهم جدًا وصاحب بصمة أكيدة في صناعة الدراما المسيحية وهو المُبدع الأستاذ چوزيف نبيل،
فكتمت الخبر المُفرِح ده جوايا لحد ما العمل الهايل ده يطِلع للنور ويتعلن عنه لأني كنت متشوق ومتحمس جدًا للعمل ده تحديدًا، لأن مش كتير إللي تطرقوا لإبراز أهمية وقوة عمل الرهبنة تحديدًا نظام الشركة، فالحمد لله العمل خرج للنور وتم عرضه وإفتتاحه الأسبوع إللي فات بحضور قداسة البابا وعدد هائل مِن الآباء الأساقفة والكهنة والأساتذة صُناع العمل وغيرهم كثيرين مِن الفنانين والإعلاميين الكبار جدًا، فحقيقي فرحان بإنهاء وإكتمال هذا العمل العظيم وأتمنى يتم عرضه في كل الكنائس والمسارح الكنسية لأنه أكيد مقدِم رسالة وتوثيق وتأريخ لأحداث مهمة جدًا حصلت في الفترة دي أثرت على الكنيسة والحركة الرهبانية بشكل كبير، الفيلم بُذِل فيه مجهود رهيب مِن إنتاج ضخم لمُعدات أحدث ما يكون لتمثيل بإحتراف لمشاركة متميزة لنجوم كبار جدًا لهم أعمالهم المؤثرة في السينما والتليفزيون، الفيلم تم إعداده في سنين مش قليلة علشان العمل يطلع لائق بقيمة الكنيسة وبقيمة الموضوع المُقدَم عن الرهبنة الجماعية وحياة الشرِكة.
فمن قلبي أهنئ وأبارك لصديقي وأخويا الكبير الفنان أيمن أمير والسيناريست الكبير ماهر فريد والمخرج العبقري فعلًا چوزيف نبيل ولكُل صُناع العمل العظماء على عرض الفيلم وخروجه للنور، ثمرة جهدكم وتعبكم باينة لكل الناس، ربنا يستخدمكم أكتر وأكتر وتمجدوا اسمه القدوس بمواهبكم وبأعمالكم إللي بتعطش الناس لربنا ولطريقه الحلو المؤدي للحياة الأبدية، مبروك عليكم يا حبايب قلبي بالنجاح والتوفيق دايمًا، حقيقي فرحان ليكوا جدًا.❤️❤️❤️❤️❤️
– الصورة تصوير المخرج الجميل مرقص فوزى
#أبانوب_فوزي
يمكنك دعم الموقع من هنا
مؤسسة ندى لحماية الفتيات
