يا ترى الرجالة فعلًا بتعدّد من كُتر التدين، وحبًا في تنفيذ الشرع؟، ولاّ ببساطة بتكون طفاسة مش أكتر زي ما قال محمد رمضان “جعفر العمدة ” بلسانه في مشهده مع زينة “عايدة” بكل وضوح “أيوة أنا طِفس، وأيوة بحب الستات” وكأن مشاعر السِت اللي بيتجوز عليها دي واختياراتها ولا حاجة قصاد رغبته هوّ.
وهل فعلاً لو حكّمنا الشَرع هيقولّنا إن عادي راجل يستغل احتياج مادي لسِت ويجبرها تتجوزه وهو عارف ومتأكد إنها مش قابلة ولا موافقة، لمجرد إن الأنا بتاعته صوّرتله إن مينفعش حد يقولّه لأ؟ وإن في أي وقت “حب هوَ” واحدة هيتجوزها تحت أي ظرف، مع إن شرط من أهم شروط الزواج القبول من الطرفين مش إن الجواز يكون زي السلعة بنشتريها؟
وهل الشرع حَلل فعلاً إن الراجل يدخل كل يوم على مراته بواحدة تانية ولاّ رابعة من غير ما يسألها ولا حتى يعرّفها؟ وهل وهل وهل! مغالطات كتير جدًا بتحصل وبتتجسّد في مسلسل “جعفر العمدة” بطولة #محمد_رمضان و#زينة و#هالة_صدقي وإخراج #محمد_سامي على إنها شيء عادي ويدعو للضحك واللذاذة ويلاّ كلنا نسقّف للبطل الجامد، من غير أي مراعاة لمشاعر الستات اللي جوزها بيقرر يعدّد لمجرد إن ده مسموح له والشرع أجاز له أربعة بدل ما يعمل حاجة “حرام”، ومش مهم بقى بيعمل كام حاجة حرام ومش إنسانية وهو بينفّذ كده.
ويُذكَر إن المسلسل ده ما هوَ إلاّ حلقة في سلسلة مسلسلات محمد رمضان اللي دايمًا بيظهر فيها بشخصية البطل اللي بيتعامل مع الست على إنها جزء من ممتلكاته وممكن يكون جزء مش مهم كمان.
من أول مسلسل “الأسطورة” و”نسر الصعيد” ولحد “جعفر العمدة”، كلها شخصيات ذكوريّة مع اختلاف الظروف المحيطة، وكلها هدفها تصوير الراجل على إنه مِحور كل حاجة، ولازم يبقى شاطر وقوي وبيساعد الغلابة وأجمد واحد في الحارة “وكل البنات بتحبه وكل البنات حلوين” علشان يبقى معاه امتيازات قهر الست اللي معاه والجواز عليها وإهانتها ونفضل نحتفي بيه رغم كل ده.
كتابة : آية غلاب
#جعفر_العمدة
#رمضان_2023
#لا_لتعدد_الزوجات
#مرصد_دراما_رمضان
#التدين_المجتمعي _الجميل
#قسم_السينما_والدراما
يمكنك دعم الموقع من هنا
مؤسسة ندى لحماية الفتيات
-
-
-
-
-
-
-
-
