وأنت جاي وفي ايدك الرضعة عشان تغدي النونة نسيت أهم حد في الحدوتة وهي الأم ..
نقاشات الفيسبوك بقالها يومين رجالة بتهزر على تصريح المحامية نهاد أبو القمصان حول الفتوى الدينية واللي مرجعيتها القرآن والسنة بإن الست مش مجبرة ترضع طفلها، وكالعادة الرجالة اعتبروه شأن شخصي وناقشوه من غير ما نسمع من الستات! ناقشوا أمر مستحيل يختبروا مشاعره أو معاناته كالعادة.
غدي النونة / متتدلعيش / سيباه جعان ليه / الرضاعة فطرة/ ازاي صدرك وجعك وغيرها من الأحكام المطلقة اللي مراعتش الفروق الفردية بين كل ست والتاني وقدرة تحملهم ورغبتهم في خوض تجربة زي دي..
الرضاعة الطبيعية بتعرض الستات لآلام مختلفة زي تحجر الثدي والتهاب الحلمات وتشققها ده غير آلام المفاصل بسبب وضعية الرضاعة وحمل الطفل، كمان ضعف التغذية في حالة معاناة الست من اكتئاب ما بعد الولادة ده غير أن هرمونات الرضاعة نفسها بتزود الشعور بالقلق والتوتر والحوف واللي بيأثر عليها وعلى طفلها.
ده غير إجبار الست على تعاطي أدوية أخف لأمراض كتير زي الاكتئاب عشان ميأثرش على الرضاعة.. كل دي جزء بسيط من معاناة ومشقة بتقوم بيها الأم يوميا لحد الفطام، ومن حقها حد يقولها انتي مش مجبرة تعيش الألم ده !!
الرضاعة الطبيعية مش مادة للميمز والإجبار عليها جريمة في حق الست، الأم تقدر تقدم ده بكل حب لطفلها لكن مش تحت تهديد وإجبار المجتمع ليها بدون النظر إلى معاناتها وكل اللي على لسانهم #غدي_النونة
وعلى العكس اللي بيحصل كان المفروض تصريح زي ده يخلينا نشكر الستات على كل اللي بتضحي بيه عشان أطفالها، وندور ازاي ممكن نخفف عنها ونعوضها.
هنحكي مع الستات عن معاناتهم في الرضاعة الطبيعية، من حقنا نحكي ونقول اللي عشناه ونقول لكل راجل مستسهل الموضوع #غدي_النونة بنفسك لو تقدر
يمكنك دعم الموقع من هنا
مؤسسة ندى لحماية الفتيات
-
-
-
-
-
-
-
-
