متفقين ان عصر عبد الناصر كان فيه مجموعة من العمالقة المبهرين فى كافة المجالات، فى السينما والمسرح والغناء والأدب والصحافة والسياسة والتعليم، كنا عمالقة فى كافة المجالات، ولكن الحقيقة العظمة الفكرية دى كلها كانت من نتاج العصر الملكى، ونتاج عصر عبد الناصر شفناه فى عصر السادات ومبارك، وكان الأساس للنهضة العامة دى هو التعليم، سواء مدارس الحكومة او مدارس الراهبات، ودى إللى عايزين نتكلم عليها هنا …….
البداية كانت مع مدرسة الراعى الصالح سنة ١٨٤٥ ، وبعدها مدرسة القديس يوسف سنة ١٨٤٧ ، والاتنين تابعين للكنيسة الكاثوليكية، طب هى ليه الكنيسة الكاثوليكية بتعمل مدارس فى مصر المسلمة القبطية الارثوذكسية، بتعملها بغرض التبشير بالطبع، بس هنا ف مصر لم تكن تهدف لتبشير المسلمين، بل لتحويل الأرثوذكس إلى كاثوليك.
واسرة محمد على اهتمت بالمدارس دى جدا، وكان الحكام بيدعموها وبيزوروها فى سبيل النهضة بالتعليم المصرى، وانتشرت المدارس دى بشكل كبير إلى درجة اننا النهاردة عندنا ١٦٨ مدرسة كاثوليكية، ٨٠ % من طلبتها مسلمين، وعندنا ٦٠ مدرسة للانجيليين، فيها ٢٥ الف طالب مسلم، مقابل ١٨ الف طالب مسيحى، وعندنا ٥٠ مدرسة ارثوذكسية ، بس دة عدد قليل جدا لو عرفنا اننا سنة ١٩٠٨ كانت المدارس الفرنسية فقط تضم ٢٥ الف تلميذ يعنى حوالى سدس تلاميذ مصر كلها، دة غير ٢٥٠٠ تلميذ فى مدارس غير فرنسية ولكنها تقدم تعليم فرنسى، وغير المدارس العلمانية الخاصة.
طب ايه إللى حصل وقلل من عدد المدارس دى ؟ حسن البنا والإخوان المسلمين وعبد الناصر، ازاى ؟
قلنا ان اى حركة شعبية لازم تخلق لها عدو وهمى عشان تجتذب الجماهير، دة إللى عمله حسن البنا، وهاجم مدارس الراهبات وادعى انها بتنصر المسلمين، وثار الناس على الكفرة إللى يدخلوا بلادنا وينصروا عيالنا، صحيح التحقيق بعد سنين طويلة أظهر ان عدد المسلمين المتحولين للمسيحية من طلبة جميع مدارس الراهبات كانوا اتنين فقط على مدى قرن من الزمان، ولكن كان السهم طار ولوث سمعة المدارس العظيمة دى .
وييجى عبد الناصر سنة ١٩٦٢ ويصدر قانون يفرض ان تكون مديرة المدرسة مصرية، وكانت مهزلة ف الحقيقة، وصلت مرة لأنهم عينوا مدير مسلم فى مدرسة للراهبات، واتدخلوا فى المواد الدراسية وحرقوا مءات الكتب بدعوى أنها ضد الدين الاسلامى، وبدأت المدارس تقل ف مصر مع الوقت.
احنا لسة بيحكمنا حسن البنا وظباط الجيش لحد النهاردة، لسة بنكره مدارس الراهبات ومصرين على تعليم مصرى متدنى المدرس قبل التلميذ فيها محتاج يتربى ويتعلم، ورافضين ارقى تعليم ف الكون مش بيكلفنا دولار واحد، بالعكس بناخد منهم ١ % من دخلهم للدولة، وبيربوا عيالنا قبل مايعلموهم.
عايز أختم بتجربة شخصية كالعادة، انا ليا اخين نفس السن والدراسة بكالوريوس تجارة من جامعة القاهرة، واحد منهم خريج مدارس الراهبات، والتانى مدارس حكومية، الأول سفير ومهذب لأقصى الحدود، والتانى موظف فى شركة ما، طب ليه ؟ الفرق فى المدرسة والراهبة والتربية قبل التعليم.
هل فيه امل ننسى الكراهية وندعم مدارس الراهبات ؟ …………. اشك.
احنا شعب بنرضع كراهية الاخر، ولبن الام المسمم بندخل بيه القبر وقلوبنا كلها كراهية .
يمكنك دعم الموقع من هنا
مؤسسة ندى لحماية الفتيات
-
-
-
-
-
-
-
-
