امبارح راكب مشروع ومروح تعبان ودماغي مصدعة هتموتني والسواق المُتدين المُحترم مشغل بني آدم بيقول أدعية ويولول ويصوت مش عارف ليه بصراحة؟!
وأنا قاعد في اخر كُرسي والسماعات ورايا ومش عارف أقول لأهله إيه علشان ماعملش مُشكلة والموضوع يكبر.. ده كمان لو عرف إن أنا مسيحي تبقى خربت وهيطلع العيب فيا ف الاخر وإن أنا إللي بيا شيطان ومش قادر أستمع للدعاء ولكلام الله! .. المُهم قررت ماكلموش في حاجة وأستحمل لحد ما أروح وأهيه كلها نص ساعة يعني مش حكاية لأن أغلب السواقين بجد الواحد لا يرتقي أنه يدخل معاهم في حوار أو نقاش عن أي حاجة لأن أسلوبهم صعب جدًا ولسانهم الطويل سابقهم في كُل حاجة.. فسكت وأنا في قمة الاستياء.
مش عارف بقى إيه عقلية الناس إللي بترازي وبتقرف غيرها وبتفرض عليها سماع أي حاجة في أي وقت علمًا بأن الصوت أضعاف إللي الأذن الطبيعية بتحتاجه علشان تسمع كويس!
ماحدش أطرش يعني!
لو شايف إن ده إيمان أو تدين مُفرط شوية.. فياريت حضرتك تقولنا فين في أي دين إنك مُباح لك تأذي غيرك وتجبره يسمع حاجة هو مش عايزها.. قولي فين ف دينك؟!
يبقى خلينا مُتفقين إن الدين براءة مِن شُغل الهمج ده.. الناس بقى إللي بتنتهج الثقافة دي (إيذاء الآخرين بإيمانها) جايبين المنهج ده منين! يعني حضرتك لما تشغل لي شيخ بيقول أدعية بطريقة أوڤر لا تُحتمل ولا يتقبلها إنسان عاقل أو تشغل لي قرآن بأعلى صوت أنا كده صدري هينشرح لدينك يعني؟!
علشان ماحدش يقولي أنت ضد الإسلام وكاره للقرآن والمسلمين والصياح ده كُله.. أنا كمان ضد السواقين السرسجية إللي بتشغل أغاني ومهرجانات ودوشة وبتبقى حاجة مُزعجة واخر قلة أدب.. أنا ضد إن حد يفرض على حد حاجة مش عايزها سواء الحاجة دي قرآن انجيل أغاني أي شيء.. طالما بيزعج وبيأذي الناس يبقى بلاش.. إسمع على قدك يا سيدي محدش هيعترض.. إسمع وأقرأ كتابك في بيتك مش لازم الإزعاج ده في كل الأوقات يعني؟!
على فكرة دي حاجة مش كويسة خالص بجد لو فاكر عكس كده.. أنت بتقدم صورة سيئة جدًا عنك وعن دينك لأنك ماعندكش مراعاة للناس زي ما دينك بيوصيك..
أختم كلامي بأن هوجة التدين دي مظهرية بحتة علشان الناس تدعي وتقول الله ما قوي إيمانك يا اسطا!!
والنوعية المُنافقة المُرآية دي الله لا يحبها ولا يقبلها ولا ترضيه ولا ترضينا احنا كمان.. إيمانك في قلبك.. مزاجك وأغانيك ومهرجاناتك في بيتك.. مش فرض واجب على الناس أصلًا إن أننا نستحمل ذوق وطريقة حضرتك في سماع أي شيء.. ياريت تتقوا الله وبلاش الفكر المُتخلف ده يا جماعة صدقوني مالوش لازمة.. بجد الواحد تعب وجاب آخره ومش عايز يتكلم مع حد علشان مش عايز مشاكل ومش فتنة في البلد علشان شوية ناس جهلة فاكرة إن هو ده التدين وإن إللي بيحصل ده صح وتمام التمام.. لأ يا جماعة إعقلوا وأعرفوا ربنا صح.. ربنا بيسمع وبيتقبل واحنا صدقوني بنسمع برضه بلاش إزعاج الله يجزيكم خير ويستر طريقكم!
#أبانوب_فوزي
يمكنك دعم الموقع من هنا
مؤسسة ندى لحماية الفتيات
-
-
-
-
-
-
-
-
