عن السياحة فى بر مصر ………………….

عن السياحة فى بر مصر ……………….
“3”

قلت أشتغل مرشد سياحى واشوف العالم الجميل دة، وكانت مهمتى أستلم الجروب من منفذ طابا وأوصله سانت كاترين، بس اكتشفت إن الموضوع مش كدة بالظبط، أولا إسرائيل بتبعت مندوب من عندها يتكلم فى المايك ويشرح الأماكن للسياح، طب وانا لازمتى إيه؟ هو بس القانون المصرى بيفرض عليهم المرشد يبقى مصرى، وتلاقى دورك تفتح الباب لواحد أو تترجم الكلام لواحدة………….شئ مهين جدا.
الأهم بقى إن المرشدين فى سباق محموم على مين فيهم يقدر ينام مع واحدة فى أقرب وقت، اللى عرف ينام معاها قبل طلوع الجبل، واللى عرف فى قرية صلاح الدين، والدون جوان اللى فيهم قدر ينام معاها فى المطعم ف طابا بعد ماقابلها بحوالى عشر دقايق، يعنى إحنا جايين نصطاد نسوان مش نقدم صورة حضارية للبلد، إحنا نسوانجية وخامورجية وجايين نفتح الباب للبيه المرشد اللى بيفرض إرادته عليك لأن شركته واقفة معاه وانت مش محمى، إنت طرطور ولامؤاخذة……………
بنوصل كاترين نبات ليلة وتلاقى البيه مدير القرية واقف يحمى الفضيلة والأخلاق، وممنوع واحدة تدخل أوضة واحد تانى طالما مش جوزها، والموضوع دة بيبقى مقرف جدا للأجانب، إنت مال أهلك إنت أصلا، ومين عينك حامى حمى الفضيلة ؟
ونطلع الجبل شروق أو غروب الشمس، يعنى الساعة اتنين الضهر أو اتنين الفجر، ولو بالنهار بتعدى تدخل تشوف دير سانت كاترين والكنيسة الأثرية اللى فيه، والرهبان اليونان الكاثوليك اللى بيقابلوك بسماحة نابعة من القلب فعلا، وتطلع الجبل 2700 متر وفى الآخر 700 درجة سلم منحوت فى الصخر، وتمشى شوية أدام الجروب، وشوية وراهم، وتساعد اللى مش قادر، وتطلع إزازة الفودكا من شنطتك- كان تمنها 33 جنيه- وتدى كاس للبردان فى درجة حرارة 5 تحت الصفر والتلج مغطى الجبل والمنطقة كلها، ويطلع المؤمنين يحجوا على أطهر مكان على ضهر الأرض، أطهر من الكعبة والمسجد الحرام، المكان اللى تجلى فيه الرب شخصيا للنبى موسى، ويفاجأ المؤمنين بمبنى على قمة الجبل، ايه دة ؟ دة مسجد للمسلمين، وايه اللى يجيب مسجد فى منطقة مقدسة لليهود؟ تقول له طب مااحنا عندنا مسجد جوة دير سانت كاترين وماحدش بيفتح بقه بكلمة ……………………..
وتنكد عليهم عيشتهم وتعرفهم إن الإسلام هو الحل، ويسبوا الدين ويكفروا بالرحلة والحج والجبل وموسى والمرشد السياحى المسلم ………………
تانى سبب لخراب السياحة هو التحرش بالأجنبيات، والتفاخر بقدرتك على احتلال جسمها فى أقرب فرصة، وف نفس الوقت بتفرض عليهم دينك ومسجد جوة أطهر بقعة على وجه الأرض.!!
تخيل لو اليهود بنوا كنيس أو معبد ليهم جوة الكعبة …………………….

يمكنك دعم الموقع من هنا
مؤسسة ندى لحماية الفتيات