عملت الصفحة ب 2018 بشهر نيسان
وكنت مآمنة جداً أنو سياسة الحظر وأنو اجمع بصفحتي بس الناس اللي بتفكر متلي ما رح اتبعها، وقررت أنو ما بدي أتقمص شخصية الحكام والساسة أو أي حدا بيستلم أي شي مهما كان صغير، اللي بيفكروا حالن غير قابلين للمساس ولا النقد، لهيك قريت آلاف التعليقات اللي عم تسخر مني بأكثر الطرق فراغ ووضاعة وتركتا، لاني كنت مفكرة اني عم اعمل الصح واترك المكان مفتوح للكل، بس اللي اكتشفته مؤخراً أنو المسخرة وولع البعض بأنهن يكونوا مهرجين بأي طريقة وأنو يبينوا ظراف، وأنو حقيقة عدم امتلاك البعض لقدرة على الكلام والمحاججة بمنطق وبالتالي لجوئن للمسخرة، خلا الصفحة تحيد عن هدفها واللي هو فتح باب للنقاش..
لهالسبب بيأسفني قول أنو سياسة الصفحة من الآن وطالع رح تكون حظر أي شخص مو جاية يناقش بجد، حلو المزح بس الحقيقة بمكانه..
بالإضافة لأنه ما رح اسمح شخصياً بمساحة خلقتا للقسوة والوقاحة أنو يتم التعامل معهن على أنهن أمر عادي، بدك تختلف معي وتشوف فكرتي ضعيفة وقاصرة وعديمة المنطق حقك وبحترم هالحق وبصونه، بس عبر عن هالشي باحترام أو اتجاهل المنشور وروح هرّج بمكان تاني..
هي المنصة انعملت لأنها حاجة، إذا مو بالنسبة الك فبالنسبة لآلاف غيرك..وبعرف أنو هالشي بيستفزك، لانك متعود دوماً أنو نحنا ببلد الحزب الواحد والفكر الواحد والقائد الواحد..بس هالشي مو حقيقة، بيأسفني خبرك أنو الفكرة اللي بتجي بتسب وإنت عم تدافع عنها بالتعليقات فيه ناس بتشوفها ساذجة.
اختلف بمنطق واحترام أو اتجاهل واهدر طاقتك بمكان تاني.
#ريم_محمود
#نسويات_سوريات
يمكنك دعم الموقع من هنا
مؤسسة ندى لحماية الفتيات
