سؤال بريء :
– ليه الصفحات المسيحية منزلة تهنئات بس للمسيحيـين إللي جايبين مجاميع عالية في الثانوية العامة؟!
– ليه الصفحات الإسلامية منزلة تهنئات بس للمُسلمين إللي جايبين مجاميع عالية في الثانوية العامة؟!
– ليه الصفحات السلفية وغيرها من نفس المنهج منزلة تهنئات بس للطالبات المنتقبات والمحجبات إللي جايبين مجاميع عالية في الثانوية العامة وأم شعر لأ عيب وما يصحش؟!
صدقوني الوضع ده خطر جدًا على المُجتمع، وأدق مُسمى للي حاصل هو (تفرقة عنصرية) آه بجد تخيل! ، إللي هو كل واحد يفرح ويهلل لنجاح إللي ينجح ويتفوق من أتباع دينه وفكره وكأن ده نُصرة ليه وللدين، ودّينا النجاح وربطناه بالتقوى والإيمان مش بالجد والتعب والإجتهاد، وجزئنا فرحتنا ببعض وضيعنا معاني كتيرة حلوة بينا، مالكوا يا مصريين؟! ، ما تفرحوا بنجاح بعض، الناجح من أي دين ده شرف لبلدنا كلنا ويستاهل كلنا ندعمه ونشجعه، أيًا كان دينه وفكره إحنا مالنا بدينه أصلًا؟! ، مسلم مسيحي يهودي هندوسي ملحد .. محجبة منقبة كاشفة شعرها مغطياه .. كلنا إنسان يا سادة .. في إيه، إيه إللي أتغير فينا يا شعب مصر؟! ، أخاف بعد كده الدكتور منهم مثلًا يقول أنا مش هعالج غير إللي من ديني والباقي يولع .. صدقوني مش بعيد طول ما عندنا البذرة موجودة هتكبر وتنمو مع الوقت وينتشر الجهل والتخلف والتطرف ده في المجتمع، ياريت نرتقي شوية بإنسانيتنا، ومبروك النجاح لكل إنسان تعب وإجتهد وربنا كرمه وعوضه في الاخر، ولكُل مجتهدٍ نصيب، تحياتي للجميع.❤️
#أبانوب_فوزي
يمكنك دعم الموقع من هنا
مؤسسة ندى لحماية الفتيات
