اتربينا من زمان أن الأعمال المنزلية هي أعمال فطرية للمرأة وهو دورها الأساسي وبلا مقابل أو عائد أو تقدير ..وبالتالي هي أعمال غير مرئية أو معترف بها!، تخيل لما يكون العمل ده هو الدخل الوحيد للأسرة أو للأفراد! وهو عمل غير مقدر من ربات المنازل باعتباره عمل خفيف غير مرهق، هل هيكون مقدر من أصحاب العمل أو من الدولة!
تصورنا عن طبيعة الأعمال المنزلية أدت لظروف عمل قاسية كتير خصوصاً للسيدات، لأن احنا عارفين طبعا أعمال المنزل هي مهمة الستات بس ولأن أعمال الخدمات المنزلية لا تندرج تحت مظلة قانون العمل في مصر ده بيأكد حدوث انتهاكات في حقوق العاملات قانونية أو اجتماعية داخل أماكن العمل، ولأن نوع العمل ده خاص بالستات بشكل أكبر فا بيكونوا عرضة أكتر للانتهاكات الجسدية والنفسية والجنـــ-سية وتأثيرها عليهم أكبر مع عدم وجود قوانين لحمايتهم وتأمين حقوقهم سواء ظروف عمل مناسبة و آدمية أو تأمينات أو معاشات أو إجازات أمومة أو حتى عدد ساعات عمل مناسبة! طبعا منقدرش ننسى حادثة التعذيب المشهورة الممثلة وفاء مكي سنة 2001! ولحد دلوقتي الحوادث اللي زيها بتتكر وبشكل أبشع، لأن نقدر نقول إن حال عاملات المنازل المصريات منهم والأجانب أشبه بالعبودية الحديثة أحيانا بسبب اعتبارهم ملكية خاصة لصاحب العمل، يعمل فيهم اللي هو عاوزه.
كمان السيدات العاملات في البيوت بيتعرضوا لعنف اقتصادي بسبب التقليل من أجورهم وحرمانهم منها أحيانا، مع العلم أن أغلبهم هو العائل الوحيد لأسرهم -بغض النظر عن سن السيدة العاملة أو حتى لو كانت طفلة برغم أن القانون المصري بيمنع العمالة المنزلية لسن أصغر من 21 سنة أو أكبر من 60 سنة- أو بيتم استبدال أجورهم ببدلات زي الأكل و مكان الأقامة اللي في أغلب الأحيان كمان بيكون غير مناسب او آدمي وبدون أي خصوصية بالإضافة لعبء العمل المنزلي اللي بيقوموا بيه في بيوتهم كمان!
شغل العمالة المنزلية هو قطاع كبير من الاقتصاد لكن في نفس الوقت العاملات فيه بيتعرضوا لتهميش و وصم إجتماعي! ولأنهم سيدات عاملات ليهم الحق في عمل بظروف مناسبة بدون ظلم وتقدير ظروفهم من جهة الدولة وأصحاب العمل لأن أغلبهم هو العائل الرئيسي لأسرهم ده غير أنهم في الأغلب بيعيشوا تجارب عنف من الشريك أو من الأسرة، بنتمنى قريبا النظر تاني في ظروف عملهم والقوانين الخاصه بيهم و عمل نقابات تحفظ حقهم بشكل يليق بيهم.
شاركونا قصصكم مع عاملات المنازل وشايفين اية الاجراءات المناسبة لحفظ حقهم؟
#المرأة_المعيلة_المهمشة
#دعم_المرأة_المعيلة_في_مصر
#من_أجل_مواطنة_كاملة_للنساء
#نحو_حياة_أفضل_للنساء
#النساء_المهمشات
#التمكين_الاقتصادي_هو_الحل
#لولا_شغل_أمي
كتابة وفاء خالد
يمكنك دعم الموقع من هنا
مؤسسة ندى لحماية الفتيات
تسلم ايديكي يا وفاء عظيم جدا❤️