– شاب مصري إسمه (تميم يونس). أنا معرفوش شخصياً ولا عمري سمعت له أي (اغنية). لأني مبسمعش غير (موسيقى) .. من كام يوم تميم نزل أغنية اسمها (Salmonella). تعليقات الناس اجبرتني أسمعها. لقيت الأغنية بتشجع أي شاب على (التحرش). وأن هو يتجرأ على البنات من نوعية كلام (عشان تبقي تقولي لا) و (يلعن أبو شكلك).
- تميم لما شاف الضجة دي. نزل فيديو قال فيه أن الهدف من الأغنية متفهمش وأن هو (بيسخر من الذكور في مصر). بس يا تميم. عايز تقنع نفسك أن ال3 مليون اللي سمعوا الأغنية عارفين إنك بتهزر؟ طب شوفتم عدد الميمز والنكت اللي من الأغنية اللي بتستخدم كمادة (للتحرش والأغتصاب).
-
كل ذكر وبنت عاجبهم الأغنية ميزعلوش لما بعد كام سنة لما ينجبوا أطفال وبنتهم ترجع مضروبة من جوزها أو من حبيبها ومتقال لها (يلعن أبو شكلك) لمجرد إنها رفضته لأني أعتقد أن ال90 % من اللي مبسوطين بالأغنية نسيوا كل الحجات اللي أنا هقولها دي :
-
مصر. نسبة التحرش فيها 100%. معروف إن أغلب "شباب حواري واقاليم مصر". مش بيقدروا يسيطر على أعضائهم ولا عندهم (احترام لأي أنثى). فالاغنية بترسخ لده. أغنية لا فيها (ذوق ولا فكر).
-
الأغنية اللي سمعها ملايين. بس اللي شاف فيديو تميم اللي بيوضح فيه حقيقة الهدف من الأغنية (آلاف). وده بيوضح إن محدش مهتم بالهدف من الأغنية. وأن كل الكلام السيئ اللي فيها أتفهم خلاص .
-
أنا مش فارقة معاي نوايا تميم. وده بغض النظر على أن في كلام كثير إن هو (متحرش). وبيأذي السيدات في الكواليس بس ده مش موضوعي حالياً. لأن مفيش دليل مادي على ده وأنا والله كنت هحترم تميم في حالة واحدة (لو طلع اعتذر) عن الأغنية. أو كان عمل بدالها (أغنية تسخر من الممارسات الذكورية).
-
وللأسف. الجيل الحالي من الشباب وصل لمرحلة من عدم التفريق بين الصح والغلط. بين الأحترام واللا إحترام. بين السخرية بشكل هادف وبين أغنية بتدعي للتحرش .. لا وفي ناس بتكابر بالغلط كمان .
-
وأخيراً :
– أنا مش أوفر. واللي مضايق من كلامي يروح حالاً يشوف (فيديو التحرش الجماعي في المنصورة والزقازيق). وياريت لو تدخلوا على اكونتات العيال اللي عملت كده. هتلاقوا نصها ميم ونكت على (الأغنية). وأن مش من حق أي بنت تقول (لا). فحتى لو كانت نواياك "حسنة". يا تميم. كان لازم توضح ده على الأقل قبل الأغنية وخصوصاً إنك محسوب على الطبقة المثقفة والواعية .
أحمد عرفات | كاتب علماني
