في ظل الأزمة الصعبة إلّي بتمر بيها البلد من حالة تضخم غير…

في ظل الأزمة الصعبة إلّي بتمر بيها البلد من حالة تضخم غير عادية وإرتفاع مهول في الأسعار بشكل شبه يومي، حابب أقول للناس كلها أطمنوا ربنا مش هيسيبنا لأنه عمره ما سبنا قبل كده وياما عدينا أزمات أكبر من كده بكتير، ده مش كلام تخدير ولا دروشة دي حقيقة فعلًا.. وبما إن معروف عننا اننا شعب مصري أصيل وجدع وبيبان معدنه وقت الأزمات والشدة.. حابب أوجه رسالة لكل رجل جدع في البلد دي علشان نعدي المرحلة دي بسلام..

فيها إيه لما نساعد بعض.. إيه جو الشحاتة ده؟!!
مش شحاتة ولا حاجة على فكرة، بس لو كل واحد فينا ساعد غيره من خلال عمله أو وظيفته هتفرق كتير..
يعني إيه!؟

يعني يا سيدي ده مش وقت مكسب مش وقت تحويش على حساب ناس مش لاقية تأكل.. أهم حاجة كلنا نقدر نعيش مستورين وخلاص.. مش لازم ندبح بعض ونمص دم بعض.. محدش ناقص محدش مستحمل.. كلنا على اخرنا..

عايز تقول إيه يعني؟!
– عايز أقول إن لو حضرتك مثلًا دكتور بدل ما كشفك يبقى بـ ٤٠٠ و ٥٠٠ مش هيحصلك حاجة لو خليته بـ ١٠٠ أو ٢٠٠
الواحد بيطلع عينه اليوم كله على ١٠٠ جنيه في اليوم ده
لو جابها أصلًا..

– ولو حضرتك مدرس وربنا موسع عليك وعندك في المجموعة الواحدة طلاب كتير وليك اسمك.. مش لازم تدبح أهالي الولاد إلّي بيتعلموا دول.. وبدل ما درسك في مادة واحدة بيوصل لـ ٣٠٠ وأكتر لأ يا سيدي الرحمة حلوة مش هيحصل حاجة لو خليته بـ ١٠٠ مثلًا.. حضرتك مش بتكسر حجارة يعني!

– ولو حضرتك صنايعي بدل ما تكسب من عريس داخل على جواز ٥٠٠٠ جنيه في كام يوم كفايا ٢٠٠٠ ، ٣٠٠٠.. وربنا هيبارك.

– ولو حضرتك سواق وأجرتك مثلًا ٥ جنيه وحد أدالك ٣ أو ٤ أو ٢ حتى خدها وأنت ساكت وأشكر ربنا أنت ماتعرفش ظروفه مش لازم تحرجه قدام أمة لا إله إلا الله، وصدقني ربنا هيبارك ويعوض ويحافظ عليك في طريقك.

– ولو حضرتك محامي لو بتقدر أتعابك بـ ١٠٠٠ مفيهاش حاجة لو جيت على نفسك شوية وأخدت نصهم.. ربنا يكفيك شر المصايب والبيوت الفاضية والعيشة إلّي ع القد.

– ولو حضرتك صيدلي وبتبيع علاج يشفي أو يخفف أوجاع الناس.. بلاش مكسب الـ ٤٠ والـ ٥٠٪ ده دلوقتي.. حرام المتاجرة بآلام الناس.. الضرب في الميت حرام.. ده مش وقته.. فرجاءًا شوية إنسانية ورأفة بالناس بس يا جماعة.

– أما بقى لو حضرتك تاجر وخاصةً بقى تاجر الأكل والشرب ومنتجات وسلع أساسية الناس ماتقدرش تعيش من غيرها.. فراعي ضميرك قدام ربنا وبلاش شغل الإحتكار ده ورفع الأسعار حسب المزاج.. وتخلوا الناس تلعن في الحكومة ليل نهار وتكره البلد بسببكم.. محدش قال ما تكسبش بس كله بالمعقول وبما يرضي ربنا.. الناس بتكح تراب ومش قادرة.. ليه تدبحهم وتحمل عليهم وهي يوميتها يدوبك تكفيهم عيش حاف.. لو كل واحد راعى ربنا في شغله مكناش وصلنا الي احنا فيه ده دلوقتي.

– ولو حضرتك بتاع هدوم.. مش لازم جو الـ ٢٠٠٪ ده.. في ناس مش لاقية تلبس.. لا داخلي ولا خارجي حتى.. رفقًا بيهم شوية.. السُترة حلوة.. والمكاسب الكتير حرام لو من إستغلال الناس بأي حجة فارغة زي الدولار والأسعار.. دي حجة خايبة بيضحك بيها على المواطن البسيط الغلبان.. أغلب الناس هي إلّي بتغلي بمزاجها.. والدولار بريء.. والحكومة بريئة.. العيب في جشع الناس وقلة ضميرهم وقلة دينهم.

من الآخر إلّي عايز أقوله.. إننا لازم علشان نعدي تبقى أيدينا في بعض وقلبنا على بعض.. احنا أهل وأخوات وفي مركب واحدة يعني لو لا قدر الله لو غرقت هتغرق بينا كلنا.. لازم نحافظ على أسرنا وعلى بلدنا وأستقرارها وأمنها.. مايعرفوش قيمة الوطن غير إلّي فقدوه.. ده وقت إننا نعيش مستورين ونقول الحمدلله على كده مش أكنز وأعمل فلوس على حساب فقير مش لاقي يأكل.. لو هنيجي نبص للوضع ده هنلاقي إن أغلب إلّي حصل وبيحصل ده إحنا السبب فيه مش حد تاني.. ياريت نحن على بعض وكل واحد يساعد أخوه من عمله أو منصبه وصدقوني هتعدي بينا كلنا.. ياريت نراعي ربنا بس..

وإلّي هيعمل زي ما قلت هيشوف بركة ربنا في بيته وفي حياته وولاده إزاي.. المسيحي يدي عشوره لأي محتاج والمسلم يدي زكاته لأي محتاج.. والغني يدي الفقير والفقير يساعد الأفقر منه وساعتها كده هنكون حققنا قصد ربنا من تكملنا لبعضنا.. احنا كلنا واحد.. ياريت كلامي يوصل والناس تعمل بيه.. ربنا يعديها على خير.. صلواتكم ودعواتكم من أجل الأيام الصعبة دي ومن أجل حفظ وطنا الغالي مصر.
#هنساعد_بعض
#هتعدي
#أبانوب_فوزي

يمكنك دعم الموقع من هنا
مؤسسة ندى لحماية الفتيات