نتعامل إزاي لو الجاني قريب مننا؟
في الفترة الأخيرة انتشرت الأخبار عن جرايم، واعتداءات كتير في حق البنات، وكتير من المعتدين والمجرمين دول مبيبقاش باين عليهم أي علامات لدا، وكتير بنشوف رد فعل أهلهم بعدها وصدمتهم، وأنهم مش مصدقين أنه دا ممكن يحصل من حد قريب ليهم وعارفينه طول حياتهم.
فيا ترى فكرتي قبل كدا، لو اتحطيتي في الموقف دا المفروض تتصرفي ازاي؟
أول حاجه لازم تعمليها هي إنك تجمعي الحقايق، وتسمعي من الطرفين مش من الطرف اللي يخصك بس، وبعد ما تسمعي وتجمعي كل التفاصيل احكمي على الموقف على أساسهم من غير ما تخلي معرفتك بالطرف اللي يخصك تأثر على حكمك على الموقف، ضروري يبقي في تعاطف ودعم نفسي للضحية.
لو ثبت أنه الطرف اللي يخصك هو الجاني فعلا يبقي مش مقبول بأي طريقه انك تحاولي تضغطي على الضحية علشان تتنازل عن حقها، حتى لو تبعات اللي حصل دا هيضرك بأي شكل، لأنه للأسف اللي آذاكي هنا مش الضحية، واللي غلط لازم يتعاقب.
ولو في امكانية تقديم الدعم للضحية ومحاولة مساعدتها بأي طريقة، لأنه في أوقات الضحية مش بتلاقي دعم حتى من أهلها، وممكن مساعدتك هي اللي ترجعلها حقها.
وأخيراً وأهم حاجة هي انك تدوري على دعم ليكي أنت ويبقي احسن بكتير تتابعي مع طبيب نفسي علشان تقدري تتعاملي مع الصدمة الشديدة والموقف الصعب جدا اللي بتعدي بيه، و افتكري انه في الحالة دي انت كمان ضحية للجاني ومتتحامليش على نفسك.
تفتكروا ايه تاني ممكن نعمله لو اتعرضنا لموقف زي دا؟
كتابة: صوفيا جورجي
#توعية #الجاني #دعم
يمكنك دعم الموقع من هنا
مؤسسة ندى لحماية الفتيات
