حقوق المراة العراقية | ملهمات من بلادي

نور الماجد
* من هي نور الماجد ؟؟
نور الماجد انسانة عراقية توليد ١٩٨٧ صحفية من كربلاء
حاصلة على شهادة بكالوريوس تربية لغة انجليزية.
بداية نشاطاتي بالصحافة الاستقصائية كنت اكتب تقارير باحد الصحف في كربلاء وقتها حصلت درع الابداع من محافظ كربلاء وبالتعاون مع الامم المتحدة وايضا حصلت على عديد من جوائز لايسعني ذكرها
،دخلت دورات عديدة تختص بالصحافه والاعلام وحقوق الانسان ودورات تنمية بشرية واعداد القادة والتدريب.

*لماذا توجهتي بأهتمامك الى حقوق المراة؟؟
كل بيت عراقي المرأة هي عموده الفقري وهي دوما اللي تتحمل المسؤولية بالمقابل لاحظت انهن منتهكات الحقوق ورغم هذا يعطن واجبات ومايقصرت لذا لكيت نفسي ادافع عنهم بالبداية بطرق شخصية عن طريق الاعلام ومواقع التواصل الاجتماعي وكان عندي فرقة تمثيليه اسمها التحدي في كربلاء ايضا قمنا بعمل خاص بالنساء لكل الشرائح من الامهات والارامل والمطلقات والمعاقات شفت نتائج وفرحه عدهم واستمريت بهالشي.

*ما هي الصعوبات اللي واجهتيها بعملج ونشاطاتج ؟
الصراحة العادات والتقاليد اتجاه المراة وخاصة من محافظتي كانت صعبة والمجتمع يأثر ع اهلنا واخوتنا لكن كدرت اغير شويه من افكارهم وانه الشي اللي كنت اعمل عليه مابي شي عيب او غلط والحمدلله كدرت احقق واغير شي وكدرت في فتره قياسية ايضا اصنع اسم في بغداد مو فقط بمحافظتي.
واليوم اني مقدمه برنامج على قناه اسيا برنامج السابعة خدمي واجتماعي وداكدر من خلاله اساعد هوايه ناس مهمشة بالمجتمع او مسلوبة حقوقهم ويحتاجون مساعدة
وهذا جان طموحي والحمدلله كدرت احقق هالشي.و المشوار ماانتهى بالعكس هذه بداية والمشوار صار اصعب وخصوصا بهكذا ظروف صار على عاتقنا نجتهد اكثر.

*كلمة توجهيها للنساء العراقيات ؟
احب اكوللهن رغم كل الظروف الصعبة مو مادية وانما اجتماعية وانه بصفتنا نساء احنة دوما على عاتقنا نتحمل المسؤولية لكن الارضية متاحة اذا وضعنا امامنا هدف معين وسارت بخطوات حقيقية راح نحصل نتيجة ممتازه ومرضية واعرف هوايه نساء ابتعدوا هوايه واهتمو بامور ماتصنع تغيير ايجابي بالمجتمع
لذا اتمنى ان تتوجه النساء الى امور مجتمعية صح الشكل والجمال والاهتمام بالنفس مطلوب لكن ليخلينا نبتعد عن الجوهر والاساس واني جزء منكم وان المراة دور مهم ولازم نتكاتف حتى نصنع مجتمع راقي بكافة مستوياته وعدنا قدرات كبيرة لكن نحتاج نوجها صح.
وفي نهاية حديثي اشكر الرياضة العراقية الي قربتني لقلوبكم وكسبت محبتكم من خلال تقديمي لحفل بطولة غرب اسيا في كربلاء وبحضور اكثر من ٣٥ الف متفرج وهاشتاك
#مرحبتين_مرحبتين_عيوني

وفي الختام اقول بوركت جهودك لما قدمتيه وستقدميه في عملك ودمتي ملهمة عراقية للنساء.

#حقوقالمرأةالعراقية
#نساءمنبلادي
‏#Iraqi_women_rights
‏#sara_jassim