أنا آه أدعم فلسطين وأتضامن مع القضية إنسانيًا زي ملايين غيري في دول كتير.. لكن الموضوع ده يأثر على ابن بلدي ويضُره في أكل عيشه ويبهدله لأ وألف لأ.. اسمحوا لي أقول طُز في فلسطين على إسرائيل في يوم واحد.. لما أشوف كذا ڤيديو لرجالة بتعيط وطبعًا صعب الراجل يعيط إلا مـ الشديد القوي لما يُقهر.. ينهار بسبب تأثير الزفت المُقاطعة دي على دخله وأكل عيشه ومش عارف يعيش ولا يصرف على بيته وولاده يبقى حرام على أهل كُل واحد مُدعي وبتاع لقطة بيدعو ويشجع المُقاطعة وبيبُص لأي واحد مش مُقاطع كأنه خاين وعميل وصهيوني كمان.. إيه يا جماعة الهبل والتخلف إللي إحنا بقينا فيه دا؟! .. أنت مش بتحارب حد غير ابن بلدك في أكل عيشه ممكن يبقى أبوك وأخوك وصاحبك وقريبك.. لما بتاع دليڤري يقعد مستني أوردر إللي قايم عليه دخله علشان يأخد في عشرة جنيه ومايشتغلش أوردرين على بعض طول اليوم.. يروح لعياله ومراته بعشرين جنيه يعمللوا إيه؟! .. حرام نأزم الناس ونتحامل عليهم وهما مش لاقيين يأكلوا حرفيًا.. الفقير والغلبان يقاطع آه لكن الغني والمقتدر إللي شغال في شركة عالمية لأ إللي شغال على فيسبوك ويوتيوب يسيب شغله لأ.. لازم الفقير ندوس على أهله أكتر.. ملعونة المُزايدة والشعارات الكدابة إللي ما بنصدق نمسك في الهيفة ونتصدر شعب هيعيش ويموت مُتخلف وعايش على انتصارات فارغة وهمية.. بجد حاجة تحزن يا جماعة!!
إللي بيطالب الفقير ده يسيب شغله ويقاطع اصرفوا عليه انتوا لو فعلًا القضية على قلبكم مش مجرد غوغاء وصياح وخلاص.. أو شوفوا لهم شغل بديل.. بدل ما الأب يتذل ويتكسر قدام عياله بسبب تفاهات مُجتمع مُتخلف.. وعلى فكرة بقى لا القدس هتتحرر بالمُقاطعة ولا الدول الأجنبية هتبطل تساعد وتساند إسرائيل.. فبلاش تضروا ولاد بلدكم الدنيا مش مستحملة صدقوني.. المقاطعة مش مأثرة في حد غير في الناس إللي كانت بتأكل عيش من ورا الحاجات دي.. إعقلوا كدا وأتقوا الله وبلاش جهل وهبل.. عيب يا مصريين.
#أبانوب_فوزي
يمكنك دعم الموقع من هنا
مؤسسة ندى لحماية الفتيات
