“كل قانون الأسرة مميت للست”
دا كان رأي واحدة من المحاربات اللي كانوا معانا في برنامج “نجاة” في قانون الأسرة المصري، ورأي كتير من الستات المصريات غيرها.
وفي الحقيقة قانون الأسرة متعنت ضد المرأة بشكل خاص في شروط الطلاق، ودا اللي بيخلي ستات كتير تلجأ للخلع والتنازل عن حقوقها المادية بعد محاولات سنين في المحاكم علشان تقدر تتطلق بدون فايدة.
من أشكال التعنت دي هي شرط ” الطلاق لعدم الإنفاق”، واللي بينص على أنه لو الراجل مش بيصرف على الست فمن حقها تطلق، لكن في نفس الوقت لو الراجل أثبت انه بيسيب للست أي مبلغ تصرف منه حتى لو كان مبلغ غير كافي نهائياً يبقي القاضي هيحكم برفض الدعوى.
وشكل تاني للظلم في شروط الطلاق هو شرط “الطلاق للضرر”، ودا بينص على أنه لو حصل ضرر للزوجة، سواء جسدي أو معنوي، تقدر تطلب الطلاق، بس القانون سايب الحكم على حجم الضرر لتقييم للقاضي وآراءه الشخصية بالكامل، ودا تسبب في أن ستات كتير مبيتحكملهاش بالطلاق لمجرد ان القاضي قرر ان حجم الضرر الواقع عليها مش كفاية.
وكمان شرط “الطلاق للزواج من أخرى”، والشرط دا بينص على أنه خطوبة زوجها لست تانيه مش كفايه انها تتطلق، ومش كفايه انه يتجوز عليها كمان، لأ دا لازم يبقي في ضرر واقع من دا، وبرضو بيتساب حكم تقييم الضرر دا للقاضي، ودا زي ما وضحنا فوق مشكلة كبيرة.
ودا غير الشروط التعجيزية الكتير زي طلب شهود لإثبات الضرر الواقع على الست.
القوانين والشروط التعجيزية دي لازم تتغير، ولازم يبقي في عدل أكتر في قانون الأسرة المصري بشكل يضمن للست حقوقها في حالة طلاقها.
محتاجين يبقى في قوانين تجرم العنف الأسري وتحدد أشكاله بطريقة واضحة وصريحة ومفيهاش مجال للثغرات.
لازم تتحط قوانين واضحة تمنع الزوج من التلاعب بمصدر دخله، أو بمدخراته، أو بأملاكه في حالة رفع الزوجة دعوى طلاق لعدم الإنفاق وفي قضايا النفقة، ويبقي في عقوبات شديدة في حالة مخالفته لدا.
ولازم برضو يتلغي برنامج الصلح الإجباري في حالات الطلاق والخلع، واللي بيسمح بالمماطلة وزيادة وقت القضية بدون داعي، وفي أوقات كتير بيبقى وسيلة للعب على أعصاب الزوجة وإجبارها ترجع في قرارها.
والجدير بالذكر أنه مؤسسة قضايا المرأة المصرية قدمت اقتراح بإلغاء الطلاق الشفهي من خلال مقترحها لمسودة القانون الأحوال الشخصية، وبأن الطلاق يكون بقرار من المحكمة مع إعطاء الزوجة كافة حقوقها المترتبة على الطلاق وده هيوفر كتير على الستات من جهد ووقت بيضيع في المحاكم عشان تنال أقل حقوقها.
يا تري في مشاكل تانية بتواجه الستات في حالة الطلاق؟ وايه حلولها برايكم؟
كتابه صوفيا جورجي
#نجاة
#لسة_في_حياتك_نجاة
#حكايات_نجاة
#الاغتصاب_الزوجي
#سوبر_وومن
#١٦يوم
#16DaysofActivism2022
#حملة_ال16يوم_لمناهضة_العنف_ضد_المرأة
#سوبروومن
#16days
يمكنك دعم الموقع من هنا
مؤسسة ندى لحماية الفتيات
