توضيح مُهـم جدًا بخصوص بعض المقالات إللي بكتبها، لأني أتفاجئت إن في ناس كتير عايزة توديني في داهية وبتفهم كلامي على مزاجها، كلمني امبارح أحد السادة من أعضاء مجلس النواب، ووجه لي إتهامات وكلام عني أبعد ما يكون عن الحقيقة، وقالي الكلام إللي بيقولوه عنك طلع صح، وأنت ناشر للفتن والتعصب، وأنا بريء ومش مسؤول عنك في أي حاجة وأديني حذرتك، طبعًا كلامي مش موجه لحد بصفة خاصة ولكن في المطلق، أولًا أنا مش بتهدد ومش بخاف من حد لأني ما بعملش حاجة غلط غير إني بقول الحق، وواثق إن مش هيحصلي أي ضرر لأن البلد فيها قانون مش فوضى، وأنا بحترم هذا القانون جدًا، ولو خالفته مُستعد أتعاقب بيه، عمر ما كانت حرية التعبير والرأي جريمة طالما بأدب، وأنا مفيش كلمة واحدة كتبتها أساءت فيها الأدب لحد.
أنا إللي بثير الفتن والتعصب؟!!
– هو أنا لما أشوف حد بيعمل فتنة فعلًا في البلد وبيزدري المسيحية وبيهين في المسيحيـين وفي عقيدتهم وبيسخر منها، وأطلع أقول عيب نغلط زيه، والإسلام والمسلمين مش كده ودول أخوتنا إللي بنتعامل معاهم بحب واحترام من قرون وإن دي حالات فردية عايزة تولع البلد ولازم تتحاسب بالقانون، هل أنا كده إللي بعمل فتنة؟
– لما كل كلمة في مقال بكتبه بقول فيه (أشقاءنا وأخوتنا) المسلمين، ولما بنتقد بعض تصريحات وفتاوى الشيوخ إللي فيها خطاب كراهية وتعصب وأنتقد المسلمين إللي بيصدقوهم وقبل أي حاجة بأسبقها بكلمة (بعض) يعني مش بعمم، ولما في نهاية المقال بقول يارب أحفظ بلدنا من كل شر ومن كل سوء ومن كل فتنة، هل أنا كده إللي بعمل فتنة؟
– لما يحصل للمسيحيين مصيبة والدنيا تهيج وأكتب ألف مرة مصلحة البلد فوق كل اعتبار، هل أنا كده إللي بعمل فتنة؟
– لما أقول مش هيفرقلي حاجة لو العالم كله اعتنق الإسلام المهم نعيش في سلام، هل أنا كده إللي بعمل فتنة؟
– لما أقول نحاسب فاعل الفتنة الحقيقي علشان تبقى بلدنا بلد قانون وعدل بجد، يبقى أنا كده إللي بعمل فتنة؟
– لما طول عمري ما أساءت لحد بكلمة أو سخرت من دين وعقيدة حد أو اتدخلت وحشرت نفسي في حاجة ماليش فيها، هل أنا كده إللي بعمل فتنة؟
– وهل عرض مشكلة ما موجودة وملموسة، أبقى أنا كده إللي بعمل فتنة؟ ولا المتسبب الأساسي في المشكلة؟!!
– لما أعيد وأهنئ أخواتي المسلمين بعيدهم وأشاركهم فيه، عكس إللي بيكفر ويمنع ويحرم علينا كلمة كل سنة وانتوا طيبين وبيستخسرها فينا، هل كده أنا إللي بعمل فتنة؟
– لما يحصل حالة وفاة لشخص مسلم وأقول ربنا يرحمه، عكس إللي بيقول لا يجوز والكلام ده كله، هل أنا كده إللي بعمل فتنة؟ ولا إللي بيصرح ويفتي بهذا الجهل؟
– لما أبقى بني آدم سوي وهدفي مش عايز إرهاب وتطرف وكراهية وتعصب وكل الحاجات تبقى موجودة في أعظم بلد حضارة وتاريخ في العالم مصر، هل أنا كده إللي بعمل فتنة؟
– لما بطالب بتدخل الدولة في قضية ما بتشوه صورتها وتسيء ليها، هل أنا كده إللي بعمل فتنة؟ ولا عايز بلدي في أحسن وأبهى وأجمل شكل وصورة قدام العالم كله؟
– لما الكنائس تتولع والناس تقول دي بفعل فاعل وأنا أكتب نصدق أجهزة الدولة واللي بيقولوه، هل أنا كده بعمل فتنة؟
– وهكذا وهكذا .. من كل أفكار مقالاتي وكتاباتي..
كل إللي بكتبه في مصلحة الوطن قبل أي حاجة، وعمر ما كانت الوطنية بالسكوت والتغافل عن قضايا وأمور تخص مواطن، الوطنية الحقيقية انك تعرض المشكلة مع الحل مش تنكر المشكلة ووجودها من الأساس، أنا ماليش أي أهداف غير اننا نعيش في سلام وأمان داخل دولة مواطنة حقيقية وعدل وقانون يتنفذ على الجميع بلا تمييز أو استثناء، نفسي الإرهابيين والناس إللي بتكفر وتحرم عيشتنا باسم الدين تتحاكم وتتمحي وجودها وأفكارها والمجتمع يرجع متعايش زي ما كان زمان، كل واحد رجل دين بينشر التطرف والفتنة وبيكفر في غيره لازم يتحاكم علشان يتعلم الأدب، بتمنى من كل قلبي يتطبق القانون على الجميع وتبقى المحبة والسلام موجودين بينا للأبد، وأخواتي المسلمين دول أهم جزء في حياتنا، كامل المحبة والاحترام ليهم، اخواتنا وحبايبنا إللي عمري ما تطاولت عليهم في كلمة ولا هيحصل أبدًا..
أتمنى أكون أتفهمت صح، وربنا يبعد عني الناس اللي عايزة ليا مصايب ومشاكل وأذى، وكتبت الكلام ده علشان لو حصلي حاجة لا قدر الله أبقى سايب دليل برأتي بنفسي، وواثق للنهاية إن البلد بلد قانون.. وربنا يغير ويعدل الأحوال..
ربنا يحفظ بلدنا من كل فتنة حقيقية ويبعد عنها الشر.
#أبانوب_فوزي
يمكنك دعم الموقع من هنا
مؤسسة ندى لحماية الفتيات
تمام كلامك واللي علي راسه بطحه بيحسس عليها طالما كلامك وانتقادك لأمور صحيحه لا تخشي لومة لائم.
أنا عمري ما كنت ولا هكون خصم للدولة، لأن هدفي الأساسي المصلحة العامة، وضرر وتأزم الدولة مش هيفيد بشيء.