لو طلبت منّك تتخيّل شكل سِت مطلّقة…
غمّض عينيك وتخيّل!
شُفت إيه؟
هل شُفت واحدة “عجوزة وأرَشانة وكركوبة”؟
هيّ دي النظرة السائدة في المجتمع عن السيّدات المطلّقات، وهيّ كمان المواصفات الي أطلقتها أم أحمد على “ليلى” في مسلسل (كامل العدد) “قبل ما تشوف صورتها”…
وكانت أم أحمد رفضت تدّي “ليلى” أي صفات إنسانية إلاّ لما شافت إنها “لسّة حلوة وصغيّرة” وبالتالي لا بدّ إنها عانت كتير.
لكن تعالوا نتخيّل لو مكانش شكل “ليلى” متوافق مع معايير الجمال اللي في بال “حياة” – (والدة أحمد) – كان هيحصل إيه؟
هل كانت هتتقبّلها وتوافق عليها بغضّ النظر عن مشاعر ابنها؟
الطلاق في حد ذاته تجربة صعبة ومؤلمة على الطرفين، لكن الفرق إن السِت تُحمّل دائمًا لقب مطلّقة كشتيمة ووصمة عار، وكصفة تُقيّم على أساسها كل مرة بيتمّ تقديمها في مكان جديد!
المرأة المطلّقة غالبًا ما تُقصى وتُجبر على بذل مجهود خارق وتبرير نفسها في كل مرة وفي كل جلسة، ودة اللي شفناه في مقابلة “ليلى” لأم أحمد، ويا إما تكون سوبرلوكس وتقدم تنازلات وأوبشنز قدام تنازل الرجل الشرقي بالزواج من مطلقة! يا إما هتفضل وصم في حقها ومش هتعرف تعيش حياتها من جديد!!!
لحد دلوقتي مازلنا بننظر لطلاق المرأة وكأنه فعل بيمسَخها، عشان المجتمع بيصوّر إن المهمة الوحيدة للمتزوّجة هي إنجاح الزواج، ويعتبر أن الطلاق وكأنه أكبر فشل ليها، ووصولها ليه بيدّل على إنها أكيد فيها عيوب وأخطاء.
برأيكم، وفي حالة الست المطلقة، هل في علاقة بين شكل المرأة وحصولها على التعاطف من الغرباء؟
كتابة: فرح صلاح الدين
يمكنك دعم الموقع من هنا
مؤسسة ندى لحماية الفتيات
اكيد فى علاقة،لو حلوة شكلا أول حاجة بتتقال انتى ازاى حد يفكر يسيبك او ازاى مافيش راجل فحياتك،مقارنة بواحدة جمالهاaverage بتبقى التساؤلات ان ياترى حصل ايه والغلط فين
للاسف ، الناس بتتعاطف مع الست المطلقة حسب شكلها بطريقتين
الاول لمًا تبدو فقيرة ولاتملك ملابس جيدة ولا بيت ، بيحصل تعاطف لفقرها وللاسف البعض بيستغلوها ، و يبقوا عايزين يجوزها اى جوازة تانية ، ومالهاش حق ترفض ولا حتى تطلب حاجة
لسان حالهم (مش كفاية اتعاطفوا معها وجابوا لها حد يصرف عليها )
التعاطف التانى مختلف ، ان المطلقة تكون مهتمة بنفسها جداً ، ولابسها غالي وحياتها تبدو فيها رفاهيات ، وهنا للاسف تسمعي جملة ، مين اللى يطلق واحدة زى دى
الحكم هنا على شكلها مش اكتر ،
انما النسبة الكبيرة من المطلقات اللى بتشتغل وتتعب وتربي لوحدها ودا بيظهر عليها ، للاسف المجتمع بيبعد عنها ومش ليتعاطف معها ابداً، بالعكس مطلوب منها دايماً تثبت انها على اخلاق وانها ماشية على الrules بتاعة المجتمع ، حتى لو ماعملتش حاجة