قضايا المرأة

بالنسبة لضحية جريمة الاغتصاب.. تواصلت مع والد البنت امبارح…


بالنسبة لضحية جريمة الاغتصاب.. تواصلت مع والد البنت امبارح أكتر من مرة، ودا في ذاته كان فعل صعب جدا مكنتش عارفه هقول ايه، بس مع سماع صوت الأب الصعوبة تلاشت لأن مفيش أصعب من اللي هما فيه حاليا، أول كلمة الراجل قالها: “أنا عايز حق بنتي هي اللي شغلاني دلوقتي، عايز أعمل لها تحاليل وكشف شامل لتكون خدت عدوى من اللي عمل فيها كدا، وحد نفسي يشوفها”، أي نعم الأب متمسك بالمطالبة بحق البنت، بس واضح جدا انه بيجاهد وبيغالب انكساره وصدمته وقهره عشان يبقى صوت لبنته في أصعب انكسار ممكن تمر بيه، وللأسف صداه هيبقى مكمل في حياتها بشكل أو بآخر.

المهم دلوقتي أقدر أقول اني مطمئنة وقضية البنت راحت للجهات الصح، المركز القومي للطفولة والأمومة تواصل معاهم بمجرد ما أخدوا رقم الأب، ثم تواصل الأب مع محامية من مؤسسة القاهرة للتنمية والقانون، المعنية بالنوع دا من القضايا، ومع ضغط المكالمات الأب كان متردد وطلب مني يخلي التواصل مع المحامية لبكرة الصبح، وهنا اضطريت اقول له بالصريح المباشر: “تجاهل كل وسائل الإعلام دلوقتي، لأن مأساة بنتك بالنسبة ليهم شغل وأكل عيش، الأولوية دلوقتي للبنت وان أساس القضية يتبني صح، وعشان كدا تواصل مع المحامية دي بالذات، الخدمة كلها هتتقدم لكم مجاني، مفيش أي فلوس هتتدفعوها، وهي هتستقبلكم الصبح عشان تأخد البنت لطبيبة متخصصة توقع الكشف الطبي عليها وتعمل لها كل الفحوصات اللازمة، وهيبقى علاج نفسي كمان مع مختصين، والأهم هتبعت لك روشتة لازم البنت تأخد العلاج اللي فيها حالا مش بكرة، عشان لو البنت بلغت متبقاش معرضة لخطر الحمل، وتدخل في تعقيدات تانية احنا مش عايزنها ولا ناقصينها.. أرجوك سيبك من الإعلام وركز في البنت”، قفلت معاه وصديقتي اتصلت بيه كلمته وأكدت عليه كل الكلام اللي قلته عشان تشجعه، والحمد لله التواصل تم بالفعل وبعد الامتحان بتاعي هتواصل معاه للمتابعة وأطمن ان كل حاجه ماشيه في اتجاهها السليم.

أخيرا بالنسبة للقوانين الخاصة بجرائم الاغتصاب والتحرش والعنف الجنسي تجاه الأطفال أو النساء عموما، اتمنى الدولة تراجع العقوبات والمتحرش ومغتصب الأطفال يتم إخصاءه كيميائيا الأول، وتقعده كدا شويه في السجن كعقاب نفسي ليه ثم يتم إعدامه ونخلص، واحد بس يتعمل فيه كدا الباقي هيلم نفسه وأظن هيطرق باب العلم بحثا عن علاج، وبالتوزاي الدولة تدمج التربية الجنسية في نظام التعليم، لرفع وعي الأطفال من بدري عشان يبقوا فاهمين الفرق ما بين لمسة حنونة من عمو الطيب وبين لمسة شريرة من عمو الحيوان، ويا حبذا لو قبل ما أي ٢ يتجوزوا توفر لهم دورات تدريبية عن التربية والتثقيف الجنسي عشان يعرفوا يتعاملوا ويربوا ويحموا جيل المستقبل صح، مش يسيبوه عرضه للانتهاك من كل هب ودب.

يمكنك دعم الموقع من هنا
مؤسسة ندى لحماية الفتيات

آيات عبد الدايم (AyAt Hassan)

مَا وَدَّعَكَ رَبُّكَ وَمَا قَلَى

اترك رد

زر الذهاب إلى الأعلى