آه بطبل لبلدي ولرئيس بلدي ، أومال نطبل لمين يعني؟!
فخر ليَّ إني أعشق تراب البلد العظيمة دي وأبقى في صفها وتهمني مصلحتها وأخاف عليها بجد وأحب أشوفها قد الدنيا أحسن وأحسن وبتتقدم يوم عن يوم وبتحقق إنجازات غير مسبوقة وأشهد لها .. ويتقال عني بطبل .. أحسن ما أبقى في صف المُخرِبين إللي مش عايزينها تتقدم خطوة واحدة وعايزين يجيبوها الأرض ويهدوا إللي بناه الراجل الأمين ده بالإرهاب والفوضى والدمار والخراب .. وأبقى خاين زيهم!
مالهاش حل تاني غير كدة ، يا مع يا ضد .. يا بتحب وطنك وخايف على خرابه مِن أعدائه إللي بيتمنوا الراجل ده يمشي بأي طريقة علشان يعرفوا يدخلوا ويكملوا خراب في مصر يا ما بتحبوش وتساعدهم ف إللي هما عايزين يوصلوا له.
أنا شايف الرئيس السيسي شخص أسطوري وبطل خارق كمان وعنده إرادة وعزيمة غير عادية خلته يتحدى كل الظروف والإمكانات المُتاحة ومرضيش يستسلم للأمر الواقع إللي قبل بيه غيره وقرر يبني ويعمر ويسابق الزمن ويرد للبلد دي إعتبارها ومكانتها بين كل دول العالم، شخص شريف ونزيه وأمين وصادق في زمن عز فيه ذلك جدًا، علشان كده كل إللي له مصلحة ضد البلد دي ومش عارف يعملها هيموت والسيسي يمشي لأنه سد منيع قافل عليهم بالضبة والمفتاح، لأنه راجل وأبن بلد وأصول وبيحب بلده بجد ومستعد يضحي بروحه علشانها، ده راجل قتال وحرب ومخابرات درجة أولى فهو الوحيد إللي عارف وإللي فاهم وإللي شايف إللي محدش فينا شايفه غيره، والراجل ده لو لقدر الله مكملش لفترة تانية خاصةً في التوقيت الصعب ده إللي الكلاب عايزة تنهش فيها من كل ناحية البلد هتبقى خراب حرفيًا والإرهاب هيرجع تاني والإنفلات الأمني والبلطجة هتملى الشوارع ونقول ياريت إللي جرى ما كان، فالراجل ده سد وحصن منيع ضد كل هجمات العدو الشرسة، ربنا يحفظه من كل شر ومن كل مؤامرة، ويحفظ بلدنا الحبيبة ومواطنيها الأوفياء ليها من كل سوء، وبإذن الله تعيش مصر للأبد رغم أنف الخونة الحاقدين الكارهين الكذابين أعداء مصر أم الدنيا إللي بإذن وبفضل الله هيخليها الريس قد الدنيا زي ما وعد.
تحيا مصر بيك يا ريس يا قائدنا العظيم، كمل كلنا معاك.❤️
#أبانوب_فوزي
يمكنك دعم الموقع من هنا
مؤسسة ندى لحماية الفتيات
