” آدم: هوّ حكاية الـ safe و الـ applications اللي عندك على الموبايل، واللي هوّ ا…

” آدم: هوّ حكاية الـ safe و الـ applications اللي عندك على الموبايل، واللي هوّ النهاردة مش هينفع، بس بكرة تمام أمان، كل ده بلح بقا؟ .. أكيد! لأن شرطتين!.
نادين: معرفش! .. أنا مش خبيرة في الموضوع، بحاول!.
آدم: هوّ أنا يعني اللي فاهم.”

مشهد بسيط دار في واحد من مسلسلات رمضان السنة دي “الهرشة السابعة”!
ومع إنه يبدو مشهد بسيط لكن ده يجعلنا نتساءل عن موضوع مهم بين أي شريكين، وهو تنظيم/منع الحمل و الثقافة المصاحبة له.
الدورة الشهرية للمرأة تُعتبر نظام معقّد وفيه تفاصيل كتيرـ لكن كذلك جسم الرجل باختلاف طبيعة جسد كل جنـــ-س، دة خلاّني أتسائل، هل مسؤولية الثقافة الجنـــ-سية الخاصة بتنظيم الحمل / الصحة الانجابية مسؤولية المرأة بس؟
في سيدات كتير متعرفش تفاصيل كتير عن تفاصيل الدورة الشهرية وعن فترة التبويض وما قبلها، لكن مع وجود منصّات كتير للتوعية الجسدية والجنـــ-سية، وكمان تطبيقات حساب مواعيد الحيض الموضوع أصبح أسهل بكتير، وده يخلينا نسأل ليه الرجل لا يُشارك المرأة في تثقيف نفسه عن وسائل منع الحمل وتنظيم الأسرة؟ وليه بيرمي الحِمل كلّه واللوم على السِت لوحدها؟
بعبارات زي : “إنتي اللي نسيتي دوا منع الحمل”، “ماحسبتيش صح”، “كل الدوشة والأيام اللي تنفع واللي ماتنفعش على الفاضي!”…الخ
وحتى مع وجود وسائل كتير لمنع الحمل وتنظيمه حاليًا، لكن لا يزال تحميل المسؤولية على السيدات فقط، وهو شيء غير مُنصف على الإطلاق، لأن الرجل بيتحمّل نفس المسؤولية في الحمل أو عدمه باختلاف نوع الوسيلة.
زي ما قرار الجواز أو مشاركة الحياة مع شخص تاني قرار مهم وأساسه المشاركة…ماينفعش ننسى إن قرار الحمل أو عدمه و اختيار نوع الوسيلة هو كمان قرار قائم على وعيْ ومشاركة الطرفين لبعضهم، ومانقدرش نختزل دور الرجل في قرار مصيري زي ده ونحمّل كل العبء على السيدات فقط.
وزي ما مسلسل “الهرشة السابعة” ألهمنا نتكلم عن موضوع مصيري ومهم لكل شريكين، نتمنى نلهمكم إحنا كمان تشاركوا بعضكم قرار الحمل أو عدمه، ونوع الوسيلة المناسبة ليكم، و تثقيف نفسكم بكل تفاصيل الرحلة المذهلة دي.
كتابة : وفاء
#الهرشة_السابعة
#رمضان_2023
#مرصد_دراما_رمضان
#قسم_السينما_والدراما
#سوبروومن

يمكنك دعم الموقع من هنا
مؤسسة ندى لحماية الفتيات