هوجة من الدعم الأدبى للدكتور خالد منتصر على السوشيال ميديا،…

هوجة من الدعم الأدبى للدكتور خالد منتصر على السوشيال ميديا، وطبعا إحنا بندعم أى علمانى ولكن خلونا نتكلم بالعقل أولا………….
لما مات المرحوم وائل الإبراشى كنت أول من نشر اسم الدكتور الفاسد اللى اتسبب فى وفاته، ولأن نقابة الأطباء زى نقابة عصابة القناع الأسود، بتدافع عن رجالها ظالمين ومظلومين، وقفت مع الدكتور الفاسد اللى عالجه بدواء اسمه سوفالدى غير معترف به وغير فعال فى حالته، واتسبب فى وفاته ومن قبله سمير غانم ودلال عبد العزيز، لدرجة قلنا دى مؤامرة من نقابة الأطباء الإسلامية بطبعها لقتل رموز مصر الشريفة……….
اللى اتبنى الموضوع د خالد منتصر باعتباره طبيب وعارف بروتوكول قبول الدواء من هيئات طبية عالمية، مش أى واحد يعمل دوا ويعالج بيه الناس كأنه حلاق صحة بتاع زمان، وبعد سنة تقريبا قررت نقابة الأطباء وقف خالد منتصر، ليه يانقابة القناع الأسود؟ قالك أنصر أخاك ظالما أو مظلوما، وكتر خيره بعت وائل الأبراشى شهيد بدل مايموت صحفى علمانى.!!!
طبعا كل الدعم للدكتور خالد، وعارف إن خالد ليه شعبية طاغية بين مختلف فئات المصريين الفكرية، رغم إنه ضحل الثقافة لحد مرعب، وبيختزل العلمانية فى الحجاب والنقاب وتهنئة المسيحى وشوية العبايط اللى بينشرها الشيخ مجانص، يقوم يرد عليه الدكتور خالد، والاتنين يتلمعوا وهما لافاهمين حاجة ف الدين ولا فى العلمانية، بس هى سبوبة الكل بيسترزق من وراها، وطالما إننا فى شبه دولة يبقى خالد شبه مثقف، ومجانص شبه شيخ، والمتابعين شبه فاهميين، واتلقى أنا طعنات المعجبين بالعبط الفكرى.
أخونا نجيب سرور بيقول إن شيخ الكتاب مسك العصا وقال للتلاميذ الفلاحين فى الكتاب: ” الشخبول على الحائط”، والكل هز راسه كأنه فاهم، إلا فلحوس واحد رفع إيده وسأل الشيخ: مولانا…………..مامعنى الحائط؟؟.!!!
مصر كلها فى عصرنا المهان البزرميط دة بتسأل يعنى ايه الحيطة، ومستحيل تلاقى واحد بس عنده الجرأة يسأل عن معنى الشخبول.
الكل زاغ وفسد وأعوزه مجد الله ……………….

يمكنك دعم الموقع من هنا
مؤسسة ندى لحماية الفتيات