نيكولاس خوري | غير المسلسلات العربية التي تشجع على التطبيع، عم بنشوف صفحات من مختلف الدول

غير المسلسلات العربية التي تشجع على التطبيع، عم بنشوف صفحات من مختلف الدول العربية بتشيطن الفلسطيني في الفيسبوك وتويتير وانستجرام إلخ إلخ إلخ.. كثير واضح إنه الموضوع مش صدفة، كثير واضح إنه فيه أوامر عليا لغسل عقول الشباب بفكرة الفلسطينيين كاكا و"إسرائيل" مارشميلو!!

ليش عم بصير هيك؟؟ ما بعرف.. بجوز في اتجاه قريبًا لمعاهدات ـ///ــلام مع الكيان وبدهم يحشدوا تأييد شعبي أو فيه أنظمة بدها توافق علنًا على صفقة القرن وتساعد فيها وبدها رد الفعل الشعبي ما يكون شرس.. كلها فرضيات الله أعلم شو السبب الحقيقي..

هلأ انت كفلسطيني أو كعربي مناصر للقضية الفلسطينية شو لازم تعمل؟؟ ولا إشي فعلًا ولا إشي، عشان كلنا عارفين إنه الأنظمة إذا بدها تعمل إشي فش حد بيقدر يوقف في وجههم.. مستعدين يحرقوا آلاف بلمحة بصر إذا اعترضوا وقالوا لأ وشفنا هالحكي بعيوننا مش التاريخ إللي حكالنا..

بس فيه إشي واحد تعمله: ما تعمم.. الشعوب العربية أغلبيتها صامته، خايفة مش قادرة تحكي.. بس هم من جوا شرفاء ضميرهم صاحي وقلوبهم مع القضية لأنها قضية حق.. فبلاش يكون تعميمك مصدر ضغط عليهم فوق ما هم مضغوطين..

وصدقوني.. الشريف إللي موقف مع قضية حق بغض النظر شو هي مافي ولا قوة أو بوست أو منشور بالعالم بيقدر يغير رأيه عشان هاي قضية حق مش أكلة ولا لبسة؛ إللي بتشوقه كاتب أنا والله كنت موقف معاهم وهلأ بطلت بسبب وساختهم هذا يا إما لجان إلكترونية بيكتب شو بينحكاله، يا إما صهيوني ديوث من طول عمره وبده بس حجة عشان يعبّر عن مشاعره الوسخة إللي كان كابتها من سنين.. لم يغير رأيه فقط ظهر على حقيقته وخرج من جحره.

تحية حب واحترام وتقدير للأغلبية الصامتة في الوطن العربي.. وتخجلوش من خوفكم انتو عايشين تحت أنظمة بتخافش الله… وحياتكم بعز صمتكم صوتكم الشريف واصلنا.

وأما بالنسبة للأنظمة وخنازيرها من الذباب واللجان: الحق سينتصر ولو بعد حين…. وقتها رح نترككم تتعفنوا في مزابل التاريخ في حال العفن ما قرفش منكم.

نيكولاس خوري | ناقد سياسي ساخر