بعض الأخوة على صفحتى ” هايجين” أوى على إسرائيل، عادى جدا ماانت عندك اتنين مليار هايج عليهم، ايه الجديد؟الجديد إنى بحاول أوضح الموقف من جوة التركيبة السكانية والفكرية الإسرائيلية الفلسطينية، يعنى إفهم عدوك بيفكر إزاى وفين نقاط ضعفه وقوته، مع العلم إنى مش شايف إسرائيل عدوة للدولة المصرية، بس فى كل الأحوال أنا مش المتحدث الرسمى باسم اسرائيل فى الفيس، لأننا بقينا شوية تيران هايجة وعمالة تنطح شمال ويمين بعقل تيرانى…..
تعالى للقرآن هتلاقى آيه مبهرة بتقول ” إنما يخشى الله من عباده العلماء”، يعنى ايه يخشى ؟
الخشية هى الخوف عن علم، يعنى تخاف من مخالفة إشارة المرور لأنك عارف إنك هاتتسجن، لكن الخوف هو الرهبة عن جهل، يعنى تخاف من البعبع وابو رجل مسلوخة………..
طب ازاى نوصل للعلم؟ لازم تقرا وتدرس وتسافر وتسأل، وساعتها هاتتضح لك الصورة وتعرف قدر عظمة الإله فى علاه، لكن انت مش بتخاف من إله عظيم مبدع حتى فى الخلية الواحدة، انت بتخاف من بعبع مستنيك هناك ف الآخرة عشان يعضك بالتعبان الأقرع ويشويك ف الجحيم وانت عمال تصوت ومرعوب من الإله السفاح اللى خلقته فى خيالك لأنك جاهل بتخاف مش بتخشى.
من تانى، لازم نفهم إسرائيل سواء كانت عدوة أو صديقة، والفهم يبقى سابق للكلام، ودة شئ منطقى تماما ومش محتاج شرح لولا إنى شايف حواليا شوية تيران ممكن تغزك بالمطواه لو قلت مو صلاح عظيم، أو حماس غلطانة إنها ماعرفتش توفر ملاجئ للأطفال بدلا من أنفاق للحروب ……مثلا يعنى.
إنت ممكن تخاف من التور، لأنه تور بينطح، بس عمرك ماتحترم فكره، إحنا هنا لابنخاف من التور ولابنحترم الأغلبية ولوكانت اتنين مليار تور، احنا بنقول اللى يرضى ضميرنا باعتبارنا أصل البلد ورمانة الميزان وأشرافها وأسيادها وملح أرضها………..وطظ ف الرعاع والتيران والخيخة والزيزة …………..
يمكنك دعم الموقع من هنا
مؤسسة ندى لحماية الفتيات
