رسالة للمسيحيـين المُغيبـين إللي بتصدق الراجل ده :
دي رسالة جات لي مِن الأخ محمد رحومة، مُسلم سابق تنصر، وبقى واحد مِن أشهر الناس إللي بيساعدوا المُسلمين إللي عايزين يسيبوا دينهم ويسفرهم خارج بلدهم يتعمدوا، طبعًا مش محتاج أقولكم هو بيكسب قد إيه مِن النصب باسم المسيح وإستغلال بسطاء المسيحيـين في آخذ مِنهم مبالغ طائلة وأهو كُله بثوابه ومِن أجل الكرازة والتبشير ونُصرة ورفعة المسيحية وكُل الشعارات الهبلة دي إللي بتأكل اليومين دول مع الجهلة المُغيبين باستخدام الدين كوسيلة..
طبعًا أنا رديت عليه رد مُحترم وعلمته الأدب وفضحته وانتهى الحوار ببلوك ليَّ.. مش عارف بقى بيتعمل لي بلوكات كتير أوي الأيام دي.. يالا الحمد لله على حب الناس 😊
طب أنا ليه بنزل ده؟!!
ببساطة لأني أعتقد أنه بنسبة كبيرة دخل المسيحية بزنس وتجارة زيه زي الأخت ناهد متولي بالظبط، سفر فلوس شهرة وفي النهاية أتضح إن كل ده كان وهم! لأنه مش مبني على أساس الإيمان الحقيقي بالمسيح ولكن على السبوبة والمصلحة، حاجة في مُنتهى الرُخص يعني!!
هو بالنسبة لي، ما زال غير مسيحي، ولم ولا يعرف المسيح بعد، ولا أراه مُبشرًا أو كارزًا إطلاقًا فليس كُل أحد يصلُح!
غيرتي كانت على بلدي ورئيس بلدي العظيم سيادة الرئيس عبد الفتاح السيسي إللي رديت عليه وكتبت له شوية إنجازات وتطورات عملها سيادته في الملف القبطي تحديدًا وطبعًا ولا كأنه شايف بس وكُل شيء محمله على شخص الرئيس وكأن الرئيس هو السبب أو المسؤول عن كل ما يحدث في أي شيء ومن أي أحد !!
لا يمكن لمسيحي عادي أن يكون أسلوبه هكذا، فما بالكم بكارز كما يدعي يدعوا الناس للإيمان بالمسيح المُخلص؟!
الحقيقة حسيت كلامه فيه حاجة غلط وما أرتحتش خالص لكلامه عن مصر ورئيسها بهذه الطريقة والأسلوب القذر؟!
طب أنت بتعمل كدا ليه؟! بتقول كدا ليه؟! عايز إيه أصلًا؟!
في النهاية عايز أقول لكُل المصريين..
زي ما في تُجار دين باسم الإسلام في تُجار دين باسم المسيحية، لكن كُل واحد بيُنصب ويتاجر بالطريقة إللي بتأكل وبتجيب مع الناس، المُشكلة مش في الفلوس إللي بيلموها حلال عليهم هما الأتنين ألف مبروك ربنا يزيد الجميع..
لكن في الروح الشرسة والكراهية والتطرف والفتنة إللي بتحصل مِن شحنهم للناس، فياريت كان الموضوع مادي بس وتأثيره على المادة فقط.. لا يا حضرات السادة الموضوع أخطر وأكبر بكتير.. ده كلام يحرق ويدمر دول وبلاد.. واحنا كمسيحيـين ما نرضاش أبدًا بأي ضرر لبلدنا ووطنا..
أنا كمصري قبل كوني مسيحي.. عندي مصلحة وطني وبلدي أهم من أي دين ألف مليون مرة.. الدين شُعلة بيولعوها ويحرقوا بيها زي ما هما عايزين.. عايزين ننتبه ونبقى أيد واحدة بدل ما نقطع في بعض ونظن أننا بننصر الدين بمكاسب وهمية صدقوني مدمرة وقاتلة احنا في غنى عنها..
وياريت الأستاذ المحترم محمد رحومة يلم نفسه شوية ويبطل تحامل على مصر أم الدنيا أحلى وأجمل بلد في الدنيا كلها.. ولو كان في بعض السياسات والأمور الخاطئة إللي موجودة كله بيتصلح مع الوقت.. ده تراكم عفن سنين من قبل.. ربنا يحفظ بلدنا ويعديها على خير.. ويبعد عننا تجار الدين ويحفظنا من شرهم وفتنتهم إللي بتدمر وتخرب!
#أبانوب_فوزي
يمكنك دعم الموقع من هنا
مؤسسة ندى لحماية الفتيات
