لا لتعدد الزوجات في مصر
عايزة احكيلكم عن قصة "تعدد" كما روتهالي صديقة
كان راجل متزوج علي قد حاله شغال في مطبعة. بعدين قرر يستقل وينشئ مطبعة خاصة بيه ولما الفلوس مشيت في ايده قرر انه يتجوز تاني. مراته اتحايلت عليه وراحت لأقاربه واصدقائه عشان يقنعوه يغير رأيه. بس الراجل اصر وبالفعل اتجوز التانية.
ومن هنا، الغيرة والغل دفع الزوجتين ان يدخلو في منافسة شديدة مع بعض في الإنجاب. كل واحدة تِحمل التانيه تحمل قصادها بعدها علي طول. واحتدمت المنافسة لحد ما الراجل بقي عنده حوالي ١٢-١٤ طفل.
الراجل ،بنغير تفاصيل كتير، اتنصب عليه في مبلغ كبير وافتقر وبقي بيدور علي اي وظيفة مهما كانت قليلة عشان يلبي طلبات القبيلة اللي علي مسوؤليته.
إيه ذنب الزوجتين اللي دفعتهم الغيرة والتباغض انهم يسببو لنفسهم اضرار صحية بالشكل ده؟
إيه ذنب الأولاد للي عايشيين في جو كله كره وغل وطاقة سلبية وفي أعمار مختلفة وليهم احتياجات للتعليم والصحة ابوهم مش قادر يكفيها؟
ايه ذنب الدولة برضه انها مطالبة توفر لهم مكان في مدرسة ومستشفي وخلافه؟
إيه ذنب الزوج برضه اللي اتحكم عليه بالاشغال الشاقة المؤبده بسبب نزوة مكنتش متخيل نتائجها؟
