مفكرون

#موضوع_اجتماعي….


#موضوع_اجتماعي.

في هذه المقالة أوجه كلامي لبعض #الرجال وليس الكل، لذلك لن أستخدم ولك أُكرر مصطلحات (البعض) (إلّا مارحم ربي) يكفي التنويه لهذا في البداية.
ليه #الرجل ينجذب للأنثى يلي ما تكون زوجته وتلفت انتباهه أكثر من زوجته، وممكن زوجته تكون أجمل!
على سبيل المثال، تلاقي رجل شاف #امرأة تحط مناكير، يجي بباله فكرة: ليه زوجتي ما تحط مناكير مثلها وتهتم بنفسها!!
يلاقي وحدة ثانية متعطرة ومتمكيجة ومهتمة بهندامها، ونفس التفكير: ليه زوجتي ما تتمكيج وتهتم بنفسها مثل باقي #النساء!!
كل ما يشوف امرأة بالشارع أو بالعمل أو غيره، يقيسها على زوجته وبده منها تكون مثل كل انثى يشوفها ويصادفها!!
يا صديقي العزيز، قبل ما تجي براسك هي #الأفكار، اسأل نفسك: هل وضع زوجتك والشيء المتاح لها هو نفس وضع المرأة يلي تشوفها بالشارع؟!
غالباً تكون زوجتك عندها أعمال منزلية من طبخ وتنظيف وغسيل وهذا كله عداك عن الإهتمام بالأطفال وتدريسهم وإطعامهم وغيره من هذه الأمور، بينما المرأة يلي تشوفها بالخارج وتقارن زوجتك بيها ممكن ماعندها كل هذه الالتزامات وحتى وإن وُجد، ممكن عندها من يساعدها ويهتم بأمور البيت، والأهم من هذا كله أن هذه المرأة أنت شفتها بالعمل أو الشارع أو مكان عام، يعني مو ببيتها، والمرأة بطبيعتها تحب تهتم بأناقتها قبل الخروج من بيتها، ولو شفتها داخل بيتها ممكن تلاقيها مثلها مثل زوجتك يعني على طبيعتها.
تلاقي واحد جالس مع زوجته ويقلّب بهالمحطات الفضائية وتطلع بنت جميلة وينظر إلى زوجته ويقارن جمالها بجمال زوجته، ويحرجها بالكلام ويقوللها: شو ناقصك لحتى ما تكوني مثلها؟!
أنا أقوللك شو ناقصها!
ناقصها بضع آلاف من #الدولارات لحتى تعمل فيهم كم عملية تجميل مثل المرأة يلي شفتها وبعدها تطلع أحلى منها.
المسألة بسيطة جداً، أنت مصعبها، مد إيدك على جيبك وشوف نتائج عمليات التجميل!
يا صديقي أغلب يلي تشوفه عالتلفزيون ويلي يعرضوه ترى جمال صناعي وليس طبيعي!!
فلا تقارن زوجتك بالنساء يلي تظهر عالشاشات.
يشوف امرأة بجسم ممشوق ومتناسق ويقارنه بجسم زوجته المترهّل والمليئ بالتشققات!!
ما أعرف هالنوع شلون يفكّر!!
هذه التشققات والترهّلات المفروض تفتخر فيها لأنها نتيجة أولادك يلي من صلبك!
هذه التشققات جاءت بعد معاناة من الحمل.
يعني لو ما حملت بأولادك كان ضل جسمها ممشوق ومتناسق مثل يلي شفتها بالتلفزيون!!
يشوف لقطة رومنسية بشي مسلسل أو فلم وأن الزوجين يلعبون مع بعض ويتمازحون ويتأسف على حاله. (ويكون عنده كتيبة أولاد)!!
هذا يا صديقي كله تمثيل، وتلاقيهم مو طايقين بعض وعايدين اللقطة أكثر من مرة لحتى تعطي صورة ملفتة للمشاهد، لا تجعل المسلسل أو الفلم قدوة لك، محبتك وملاطفتك لزوجتك تقدر تعمل أفضل من هالشي يلي تشوفه.
تلاقي الزوجة بالمطبخ مشغولة بتحضير الأكل والانتهاء منه قبل رجعة زوجها من العمل وبنفس الوقت عينها عالأولاد، وبس رجع زوجها، المطلوب منها تستقبله أجمل استقبال وبأجمل الروائح!!
طبيعي رح تكون رائحة الاكل هي الطاغية.
طبيعي تشم ريحة العرق منها لأنها انسانة تعرق مثلها مثلك.
أنت بهالحالة ما تحتاج بني آدم، تحتاج روبوت لأنه مايعرق.
أخيراً يلي حابب أقوله: كل انسان له وضعه الخاص به، لذلك لا تقارن زوجتك بأي أنثى تصادفها.
زوجتك لها وضعها يلي يسمحلها تعمل ما يسرّك بحدود الإمكان.
وكل امرأة أيضاً لها وضع خاص بها ويلي يختلف عن وضع زوجتك.
خطأ أنك تقارن كل امرأة تشوفها بزوجتك.
زوجتك هي حبيبتك وأم أولادك ومالك غيرها وهي مالها غيرك، وترى محدا رح يحبك ويهتم فيك مثلها.
لو المسألة بايدها كان ماقصرت بأنها تعيش كل لحظة معاك بفرح وسعادة وبهجة وسرور، لكن كل زوجين لهم وضعهم الخاص بهم.
جبر الخواطر لها أثر عظيم عند الانسان.
كلمة طيبة تسرّ بها خاطر زوجتك.

#شغّل_عقلك.
Hussein Alkhalil

يمكنك دعم الموقع من هنا
مؤسسة ندى لحماية الفتيات

Hussein Alkhalil

الجدال والنقاش مع المغيبين مضيعة للوقت، قل الفكرة واترك له حرية التفكير، إن كان له عقل يفكّر.

اترك رد

زر الذهاب إلى الأعلى