الصفحة دى جديدة، وكالعادة فورا بينضم ليها حوالى ألف حبيب…

الصفحة دى جديدة، وكالعادة فورا بينضم ليها حوالى ألف حبيب بيلفوا ورايا صفحات الفيس من عشرين سنة، لكن الجديد هنا إنى لقيت إقبال من الشباب تعدوا الألفين طالبين صداقتى مش فاهم ليه، وكل يوم ألاقى ييجى خمسين واحد وواحدة داخلين الخاص: إنت ديانتك إيه؟ وبعبقرية يخرجونى من دايرة الإسلام والمسيحية، وطالما أنا معترف إنى مش ملحد، يبقى مافيش غير إنى يهودى، وانا لو رديت بوافق فورا على إنى يهودى وأفتخر.!!!
الحقيقة يا جماعة الصفحة دى ملهاش علاقة بالدين نهائى، الدين اللى هو النص المقدس من توراه وإنجيل وقرآن، على راسنا وعمرنا ماهاجمنا نص إلهى طالما فيه فرد واحد بيقدسه…………حلو؟
غير كدة ماعندناش مقدسات لأفراد ولا أماكن، مافيش فرد يستحق القداسة لأن الجميع زاغ وفسد وأعوزه مجد الله، الجميع……… ولامكان مقدس لأن رب الأكوان مش هايروح يسكن خيمة يهودية ولا قبر فلسطينى، ولا حجر بدوى، وبندى لنفسنا الحق فى تسفيه تلك المقدسات، بدون أن نخرج عن المعلوم من الدين بالضرورة، حتى لايتهمونا بالهرطقة.
الصفحة للمعلومات العامة وتلخيص الكتب وكتابة التاريخ المصرى لأول مرة بعيون مصرية عاشقة ترابها، وملناش حزب ولاجماعة ولا حد يجرؤ يضغط علينا، بنكتب زى مانحب وقت مانحب، وارد جدا تلاقينى النهاردة ببوس الكنيسة وأقول عليها دى إمتداد للعظمة الفرعونية، ولو حصل موقف بكرة من الأنبا تاوضروس هاقول فيه ماقال مالك ف الخمر، ومش متناقضين إطلاقا، إحنا بنعشق كل ماهو مصرى، وبنحتقر ونقرف من الدناسة والخنوع والحيانة والبيع وتسفيه تاريخ عظيم، وييجى شيخ الأزهر البدوى يقولك كنا بدو بنرعى غنم ولما جه الإسلام بقينا بنرعى أمم، ومعلوم طبعا إن شيخ الأزهر مش مصرى، دة من القبائل البدوية المحتلة مصر من 1400 سنة، وفى إنتظار أحمس وكاموس جديد يرجع لنا مصرنا فرعونية، لما كان المصرى القديم بيقول على البدو ” الأنجاس”، ومايقدرش نبى بدوى زى يعقوب إنه ياكل مع مصرى، بيحطولهم الأكل مع الخدامين ف المطبخ، وحتى الخدام المصرى بيقرف من النبى البدوى المبجل، دة تاريخ مكتوب فى التوراه نفسها مش احنا اللى بنقول.
الصفحة لعشاق ترابها، وللى عايزين يقروا تاريخ مصر بيكتبه مصرى أصيل لأول مرة منذ نهاية عصر الرعامسة فى الأسرة 21 الفرعونية، ولحد النهاردة ماعندناش مؤرخ واحد مصرى شريف…….للأسف.
بكل الحب……………..

يمكنك دعم الموقع من هنا
مؤسسة ندى لحماية الفتيات