لا احنا متخصصين في الاقتصاد ولا بنفهم فيه، بس ربنا مدينا عقول نفكر بيها.
1 – دلوقتي لما يبقي في تضخم والأسعار عالية وبتزيد، نقوم نثبت سعر الدولار ولا نزوده علشان الأسعار تزيد أكتر؟
2 – يبقي سبب رفع الدولار مش التضخم وارتفاع الأسعار، لكن السبب ان الإحتياطي النقدي قل ومش قادر أسدد التزاماتي اللي هي بالدولار وانا عايز ألمه من السوق المحلي بأي طريقة فأرفع سعره.
3 – ما تضحكش عليّ وتقولي لما اخفض الجنيه حاجذب المستثمرين لأن المستثمر حييجي يلاقي مستلزماته المحلية غليت بنفس نسبة تخفيض الجنيه علي الأقل.
4 – طيب احنا محتاجين الدولار قوي ليه؟ لسببين أولهم لأننا بنستورد أكتر ما بنصدر وده سبب دائم وما اختلفش كتير عن قبل كده، وحله بزيادة الانتاج والتصدير، السبب التاني وهو الأهم إن الديون الخارجية اللي بالدولار زادت جدا (138 مليار) وزادت عليّ الديون والفوائد (خدمة الدين) السنوية اللي لازم ادفعها علشان أستلف تاني.
5 – طيب احنا بنستلف كتير ليه؟ ما نمشي علي قدنا أو نخلي الإستدانة في أضيق الحدود، الإجابة ماعرفش.
6 – اللي بيقولك رفع الفايدة علي شهادات الإستثمار لـ 18% حيسحب السيولة وبالتالي يقل الشراء فيقل التضخم، اقوله اللي حيشتري الشهادات حيشتريها من اللي متوفر عنده بعد ما يسدد الالتزامات الحياتية اللي محتاجها يوميا يعني شراء الأساسيات والخدمات لن يقل وبالتالي الأسعار لن تنخفض.
وهكذا يبقي الشهادات علشان اللي عنده دولار يروح يبيعه ويحوله مصري طمعا في النسبة العالية وهي سنة واحدة لغاية ما نخلص لم الدولار.
7 – تقديم زيادة العلاوة الدورية والمعاشات 3 شهور اجراء دعائي ولن يحل المشكلة لأن الفرق لازال كبير جدا بين الزيادة في الدخول الصغيرة وبين الأسعار الجديدة والنتيجة ارتفاع نسبة الفقر واستمرار العيشة المرة اللي احنا عايشينها.
8 – سؤال أخير : انتم مش قولتوا يوم ما عومتم الجنيه انه سعره حيتغير طبقا لسوق العملة ومش حتثبتوه زي زمان؟ أومال اللي عملتوه ده اسمه إيه؟
أخيرا اللي بيفهم في الاقتصاد يقولي إن كلامي غلط ويصححلي.
#بالعقل_والهداوة
يمكنك دعم الموقع من هنا
مؤسسة ندى لحماية الفتيات
