موضوع اِختفاء البنات المسيحيات.. بجد بقى أوڤر وباخ أوي.. وعيب تبقى المهزلة دي في مصر دولة القانون!
هل البنات دي بيتم خطفها فعلًا؟!
لأ يا بنات الجسد مش بيتخطف، البلد آمنة الحمد لله لا فيها خطف ولا أي حورات من إللي بتُشاع دي.
أومال في إيه..
في كتير يا حبايبي..
في قواصر بتختفي بشكل مفاجئ ومفجع وفي غموض ومحدش بيعرف عنهم حاجة.. حتى جلسات النصح والإرشاد اتلغت كمان فالدنيا اتنيلت أكتر..
في ناس معينة معروفة كويس جدًا هي المسؤولة عن تدبير كل شيء للبنات إللي بتختفي دي من تخليص ورق لزواج لشقة لفلوس لغيره وغيره..
في ناس بتمول شوية رعاع بالملايين علشان يصطادوا القبطيات في مصر ويعملوا فتنة ويهيجوا المسيحيين على البلد والأمن فالدنيا تخرب وتولع وهما دا إللي عايزينه..
في ناس في مؤسسة الأزهر الشريفة جدًا بتخلص ورق القواصر في نفس اليوم سبحانه! ورق بيخلص في سرعة البرق وڤيديو في نفس اليوم والمجموعة إياها تهلل وتصيح بدخول المراهقات والساقطات وأصحاب المشاكل الهاربين لدينهم وكأن دا هو إنتصار للدين بهذه الخسة والحقارة!
– هل فيهم حالة إقتناع واحدة؟!
سامحني يارب. قسمًا بالله أبدًا.
أنا نفسي واحدة بس منهم تطلع تقول أنا سِبت المسيحية علشان واحد اتنين تلاتة يمكن نراجع نفسنا احنا كمان.. مافيش.. هو ڤيديو بنطق الشهادتين وخلاص.. حلو كدا.
طب سؤال بريء..
ليه كلهم بنات؟!
بوضوح شديد جدًا لأن البنت في مجتمعنا هذا عفاه الله بيختذل الشرف فيها، الجماعة الصعايدة والفلاحين يقولوا شرف العيلة في البنت.. طب يا عمي كل واحد مسؤول عن نفسه وبس.. يقولك لأ عرضي وطولي وشرفي وغيره..
طب إزاي يكسروا المسيحيين دول؟!
نزوق عليهم كام واحد صايع من حبايبنا يكون عارف مشاكلها وأسرار بيتهم وكل نقاط الضعف إللي فيها الضحية، ويرسم ويلعب عليها دور الحب والحنان والأمان وقلة الأدب بتوعه فتقع من أول حضن رخيص من برة، دا مش مبرر طبعًا بس سبب من ضمن الأسباب، الأهالي الزبالة الله يجحمهم يراعوا ربنا ويتعلموا يحتوا بناتهم ويعاملوهم كويس بدل ما يتسولوا الحب من برة وترجعوا تعيطوا في الاخر.
أنا مع حرية العقيدة جدًا، كل إنسان حر في حياته وقرارته، بس إللي بيحصل بكثرة تحديدًا في هذه الأيام عبث وقلة أدب وإنفلات وفجر وبلطجة.. لازم نعرف في إيه؟! مين ورا الشبكة الزبالة إللي بتلف على بناتنا؟!
من ضمنهم حتة محامي هفأ كان في مشاكل مع مراته معرفش يطلق راح غير دينه وبقى بيحارب المسيح والكنيسة ويساعد البنات في تخليص كل الإجراءات.. انحطاط فعلًا.
البنات دي ضحايا فعلًا..
وفي قانون المفروض بيعاقب على جريمة التغرير بقاصر، فعيب أوي أن مصر العظيمة يبقا فيها الهبل والهطل دا..
عيب يا جماعة دا احنا إللي علمنا العالم كله الحضارة والتحضر نقوم نهدم كل إللي بنناه!!
أكرر كلامي تاني..
مافيش واحدة سابت المسيح عن إقتناع..
ولو فيه ياريت تطلعوا تورونا..
واحدة تكون درست وبحثت واكتشفت إن المسيحية غلط..
مش كانت في الكنيسة وفي الخدمة قبلها بيوم وتاني يوم تطلع بفيديو ساذج أهبل تقول كلمتين والموضوع خلص.
أتمنى من كل قلبي الموضوع دا ينتهي علشان احنا مش ناقصين والبلد مش ناقصة كفاية الأزمات إللي نازلة من كل ناحية، احنا اخوات وأهل وحبايب على طول ياريت نحافظ على بلدنا ونخاف عليها، ونتعلم الإنسانية قبل نصرة الدين بالباطل والكذب وقلة الأدب.. أكيد هذه الأفعال المُخزية الرخيصة ليست من الدين.. بلاش تشوهوا دينكم بنفسكم..
ربنا يعديها على خير، ويحمي بناته من الذئاب الخاطفة، خلوا بالكم يا بنات اوعوا تثقوا في حد مهما كان قريب منكم، الصدمة دايما بتيجي من القريب، ربنا يحافظ عليكم.
#أبانوب_فوزي
يمكنك دعم الموقع من هنا
مؤسسة ندى لحماية الفتيات
كلمة حق كان لازم أن تقال.. بدون خوف من حد.. أو تجميل للحقائق المخجلة.. صدقوني بتكلم في الصالح العام.. أنا واحد بيعشق تراب بلده ومش هاين عليه يحصل فيها كدا.. عديها على خير يارب.
مش غريبة شوية إن كل إللي أقتنعوا بالدين الآخر بنات؟! وكلهم ورا بعض كمان؟!