لولا شغل أمي حملة بدأتها سوبروومن السنة اللي فاتت في شهر مارس “شهر المرأة”، لتسليط الضوء على أحد أهم الأدوار اللي بتقوم بيها الست المصرية في المجتمع والمجتمع الذكوري المحافظ قرر أنه يهمش الدور ده ويفضل محافظ على صورة زائفة أن الراجل هو العائل الوحيد، وصلتنا حكايات كتير عن أمها معيلات عانت وكافحت وقصصهم بدأت وانتهت وحتى العائد من كل اللي قدمه كان صفر، لا تقدير اجتماعي ولا امتيازات ولا عائد مادي يحميها من الزمن وتغيراته.
ده حال المرأة المصرية في يوم المرأة المصرية، نضال النساء المهمشات في مواجهة تحديات ومشكلات كثيرة بشكل يومي وحتى السوشيال ميديا اللي ساعدت ان صوت الستات يتسمع أكتر مش هيقدر يكشف الغطاء عن كل اللي بتعانيه نساء مصر.
المرأة المصرية بتحتفل النهاردة بذكرى ثورة المرأة المصرية ضد الاستعمار البريطاني سنة 1919 بقيادة السيدة هدى شعراوي، وبعدها تم الإعلان عن تأسيس أول اتحاد نسائي في مصر بقيادتها في نفس اليوم سنة 1923 واللي كانت من أهم مطالبه هو تحقيق المساواة السياسية والاجتماعية مع الرجل وفي نفس اليوم كمان سنة 1928 كانت أول مرة تدخل فتيات مصر جامعة القاهرة. وأخيرا في نفس اليوم سنة 1956 حصلت المرأة المصرية لأول مرة على حق الانتخاب والترشيح بعد إقرار دستور 1956.
لحد دلوقتي نفس المطالب تقريبا الستات المصرية محرومة منها سواء كانت مساواة اجتماعية وحقها في امتيازات مقابل دورها سواء كان الأمومة أو الإعالة للأسرة أو دورها في المنزل، أو مساواة سياسية وتمثيل لصوت الست المصرية أوضح وأجرأ وحصولها على نفس المساحة اللي واخدها الراجل في المشهد السياسي والحكومي، كمان القانون بيعاملها بتمييز وبصورة مبتعكسش مواطنة حقيقية للست المصرية في وطنها.
لسة لحد دلوقتي الستات المصرية بتتعرض للعنف بغطاء ديني وقانوني ولسة الستات بتجبر على الحجاب وبيتم التحكم في جسمها، ولسة الستات بتتقتل تحت ما يسمى الشرف والقانون بيحمي اللي قتلها، ولسة الستات المصرية بتاخد ملاليم نفقة وبتتطلق غيابي وشفوي وبتجري في المحاكم عشان تنول حريتها، ولسة الست المصرية مش حاسة بأمان في الشارع ولا على الانترنت ولا جوة البيوت.وبايدين أقرب الناس جسمها بيتعرض للتشويه بحجة الدين والعادات، ولسة لحد دلوقتي بيتم قهرها على الجواز في سن صغير، وعلى الانجاب وعلى ترك الوظيفة ولسة بالقانون وبالشرع تكتشف إنها لها ضرة بتقاسمها حياتها الزوجية.
الستات المصرية لسة بيتم التمييز ضدها وحرمانها من وظيفة أو تاخد مرتب أقل عشان هي ست أو أم، والست المصرية لسة لحد دلوقتي ملهاش حق ولاية / وصاية على أطفالها، والست المصرية في نظر القانون هي مربية تتكفل بالأطفال أم الوالد فا لا حرج عليه.
الست المصرية المهمشة من كل المشاهد، النهاردة يومها .. بنقولها ان اليوم ده بيفكرنا ازاي انتي مشوار كفاحك طويل جدا وحقك أنك تعيشي في بلدك بحقوق ومواطنة كاملة مستحق مش بس لكونك مواطنة مصرية، لا لأنك دفعتي تمن ده ولسه بتكافحي ولسة دورك بيتم تهميشه..
#من_أجل_مواطنة_كاملة_للنساء
#نحو_حياة_أفضل_للنساء
#النساء_المهمشات
#التمكين_الاقتصادي_هو_الحل
#اليوم_العالمي_للنساء
#المرأة_الريفية
#الأمهات_المعيلات
#لولا_شغل_أمي
يمكنك دعم الموقع من هنا
مؤسسة ندى لحماية الفتيات
