«فطرة المرأة هي بقائها في المنزل وإنجاب الأطفال وتربيتهم» الجملة دي وجمل تانية…

«فطرة المرأة هي بقائها في المنزل وإنجاب الأطفال وتربيتهم»

الجملة دي وجمل تانية كتير شبهها اتقالت زمان ولسة بتتقال لحد النهاردة وللأسف لسه في رجــالة مصرة تحصر الستات في دور الأم في البيت ولسة في ستات مقتنعة ان ده دورها الوحيد في الحياة.

حكاية «زينب» في مسلسل«هي والمستحيل» قدرت أنها تتناول الموضوع ده من كل جوانبه

الجانب الأول: زينب كانت بنت عايشة مع أسرتها اللي حرمتها من التعليم وحددت ليها مصير واحد بس ألا وهو الزواج. وطبعا معروف ان لحد ما البنت تتجوز بيبقى ممنوع أنها تمارس حياتها بشكل طبيعي بحجة إنه لما تتجوزي ابقي اعملي كل اللي عايزاه مع جوزك بس هل جوزها فعلا بيحققلها كل اللي هي عايزاه؟ بردو لأ. لأن بييجي جوزها ويبدأ بردو يتعامل معاها بنفس الطريقة وبيبقى نادراً لو خرجوا خروجة عادية مع بعض حتى.

وما بين البيت والزوج، زينب عاشت حياتها بين أربع حيطان.

الجانب التاني:ازاي يكون في توافق بين زوجة مش متعلمة ورجل جامعي ؟

بناءً على مفهوم الزواج بإنه علاقة بين اتنين في ما بينهم قبول وتوافق في المشاعر والأفكار.
مستحيل اتنين يعيشوا مع بعض حياة سعيدة ومستقرة خصوصا الا اذا كان ما بينهم قبول وتوافق.

في مفهوم تاني للزواج واللي اتجوزت على أساسه «زينب» وهو المفهوم السطحي جدا جدا، واللي أثبت فشله الذريع فمثلاً زوج زينب «صلاح» اتجوزها عشان تخدم أمه وبس، لا كان فيه قبول ولا توافق.

والنتيجة الحتمية لده أن الفجوة ما بينهم فضلت تزيد بشكل مش طبيعي و«صلاح» مكانش بيلاقي أي مواضيع ما بينهم، فكان دور زينب مقتصر على أنها تحضر الشاي وتخدم أمه وتهتم بنظافة البيت.

الجانب التالت:«زينب» بدأت تحس إن حياتها مع «صلاح» وصلت لحيطة سد ولازم تنهيها وحتى بعد ما عرفت انها حامل منه اصرت انها تنهيها، وبالفعل أنهت زينب حياتها معاه عشان تبدأ مرحلة تانية ف حياتها.

«زينب» كانت بني آدمة موهوبة وذكية بس كان كل ده مدفون ومش مسموح ليه يظهر.

بدأت «زينب» تتعلم من أول الحروف الأبجدية لحد ما خدت شهادة الثانوية العامة. وكانت رحلة صعبة ومليانة عقبات كتيرة جدا منها كونها إمــرأة معيلة مسؤولة عن طفل وعن تلبية كل احتياجاته بس إصرارها على أنها تكون بني آدمة حرة و قادرة تقرر مصيرها بأيديها ساعدها تكمل المشوار.
زينب أثبتت أن فطرة المــرأة وفطرة كل إنسان الحقيقة هي أنها تتعلم وتكون انسانة قادرة تاخد قراراتها بنفسها وتكون فاعل في حياتها مش مفعول به.

وزي ما «زينب» لقت اللي يرشدها ويعلمها واحدة واحدة سواء كانوا عيلتها او معارفها اللي كملوا معاها المشوار

«نجاة Nagat» بتاخدك من التوهان والحيرة للنور وبتفتحلك أبواب كتيرة على العالم.

كتابة: همس محمد

#نجاة
#تمكين_اقتصادي_للمرأة
#سوبروومن
#لسه_في_حياتك_نجاة
#Nagat
#Superwomen
#قسم_الدراما_والسينما
#العنف_ضد_المرأة
#الدراما_والنساء
#قسم_الدراما_والسينما

يمكنك دعم الموقع من هنا
مؤسسة ندى لحماية الفتيات