منظمات حقوقية

لا لتعدد الزوجات في مصر | سؤال مهم وخطير من راجل من متابعين صفحتنا وهو ولو الست نمروده الراجل يعمل ايه

لا لتعدد الزوجات في مصر


سؤال مهم وخطير من راجل من متابعين صفحتنا وهو
ولو الست نمروده الراجل يعمل ايه ؟ لازم يجيبلها وحده تانيه علشان تبقي كويسه !!!!!!
طيب لأن السؤال ده مهم جدا وله جوانب كتير ردى حيكون فى البوست ده
اولا : يعنى ايه نمروده !!!!! هو حضرتك فاكر نفسك ربنا ( استغفر الله العظيم ) علشان الى تعترض على تصرفاتك تسميها نمروده !!!!! حضرتك علشان تكلمنى انزل يا عم لمرتبه البشر 😄😄😄😄

ثانيا : ليه حضرتك ما افترضتش انك فعلا كأنسان ممكن يكون فيك عيب حقيقي وكبير بيخليها تنفر منك فى مقوله عند الرجاله هابله اوى وهى ( الراجل ما يعبوش غير جيبه واتحرفت أن الراجل مايعبوش حاجه ) لا يا فندم الراجل يعيبه الغرور والكبر إلى ظاهر من كلامك ويعيبه قسوته وبخله و أيده الطويله ولسانه الطويل وكلامه الجاف و عينه الزايغه وشخصيته الضعيفه وعدم اهتمامه بشكله ……الخ مش يمكن حضرتك عيوبك اكتر من مميزاتك ؟ اوعى تصدق مامتك لما تقولك انك مافيش منك دى بس بتقولك كده علشان بتحبك اوى ( قلب الام بقه ) ليه حضرتك فاكر انك لو صرفت عليها تبقي كده عملت الى عليك وزياده !!!!! هو حضرتك جايبها من مجاعه هى اتجوزتك لاسباب كتير غير الجوع تمام ؟!!!! ثالثا حفرض معاك انك ملاك وأنها فعلا وحشه وطماعه ولسانها طويل وفيها عيوب الدنيا سيبها طلقها عايز تذلها ليه ؟ هه بصلى هنا عايز تذلها ليه ؟ حقولك انا لأنك مريض لأنك سادى يا فندم امساك بمعروف أو تسريح بأحسان لا تمسكهن ضرارا لتعتدوا مش ده كلام ربنا ؟ حضرتك اعترفت اعتراف ضمني أن التعدد اعتداء عليها لذلها وكسرها وجعلها تقبل بكل عيوبك وتحمد ربنا انك بترملها لقمه تأكلها

رابعا غمض عينك وتخيل حياتك بعد التعدد بغض النظر عن متعه انك تشوفها بتتعذب لا بجد تخيل حياتك تخيل عيالك وهم بيكرهوك لأنهم كانوا شاهدين على كسرك وقهرك لامهم على فكره قهرها مش حيخليها تبطل تعترض على تصرفاتك ( تبطل نمرده على حد وصفك) تخيل ولادك من الأولى والتانيه وهم بيكرهوا بعض تخيل كده خناقاتهم تخيل وكل وحده بتقولك اشمعنى تخيل تعب الاعصاب !!!!!!! تخيل أن مع الوقت غالبا الاتنين حيعتبروك بنك لان لو وحده بتحبك مش حتستحمل تتخيلك مع وحده تانيه تخيل كل وحده فيهم وهى عايزه تاخد منك الى تقدر عليه وتخيل انك مش لاقى لا حب ولا موده ولا رحمه تخيل لو مراتك الاولى شخصيه قويه شويه وخلعتك وخسرت مراتك وقررت تنتقم منك بأى شكل على فكره الانتقام ساعات بتوصل للقتل التعدد حياه بشعه وكئيبه للزوج و الزوجات ودمار للأبناء

خامسا واخيرا : يا فندم الجواز مش حرب ده معروف وموده ورحمه لو حضرتك مش لاقى ده دور على العيب الى مضايقات منك اتكلم معاها اتفاهم احتويها علشان تتقبل عيوبك صلح نفسك لان الله لا يغير ما بقوم حتى يغيروا ما بأنفسهم غير نفسك الأول للأفضل وأتكلم معاها ومممكن تتدخل طرف ثالث هى بتحبه وتثق فيه ولو الحياه بقت مستحيله يبقي مافيش غير التسريح بإحسان ده لو حضرتك تعرف معنى معروف و احسان وشكرا
by Meho Mokhtar

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق
إغلاق