هاشم العامر | على سيرة التحرش ، مرة كنت عند أهلي بإربد ، وقبل نص الليل ، كنت استنى سيارة ارجع على

على سيرة التحرش ، مرة كنت عند أهلي بإربد ، وقبل نص الليل ، كنت استنى سيارة ارجع على عمان ..
وأنا واقف وقفت سيارة ونزلت منها صبية بملابس النوم تقريبا ودخلت بسرعه ع صيدلية قريبة ..

والبنت طالعة شافوها شباب كانوا واقفين بالمكان ، واحد منهم قرّب ع البنت ، وقعد يحكيلها بدك مساعدة ، والبنت قالت شكرا ولو سمحت بدي اروح مستعجلة ..

الشب لزق بالبنت وبلش انا بيتي قريب إذا حابه ترتاحي .. وتعالي اشتريلك لبس ومن هالحكي ..
لانو البنت بلبس النوم والوقت متأخر الظاهر الشب لقاها فرصة ..

وما رضي يحل عن البنت اللي قعدت تصرخ وتهدده تناديلو الشرطة ..

رحت ع صاحب الشب اللي كان واقف معه ، بحكيلو جيب صاحبك عيب .. يعني صبية طالعة بنص الليل ودخلت ع صيدلية مستعجلة ، أكيد عندها ظرف ..
قام الحيوان حكالي شو الظرف اللي يطلع بنت مش لابسه ، هاي شكلها بنت ليل ..

الحكي معه عبث .. رحت ع المتحرش نفسه وقعدت احكي معه ع اساس انسيه البنت لحد ما تطلع بسيارتها وتروح .. وفعليا راحت ..

بعدها قعدو الشباب يسألوني شو دخلك .. وهي البنت أختك ، ع اساس يستفزوني وتصير مشكلة وينتقموا لأني ضيعت عليهم “فريسه” ..

ضليت هادي وقعدت احكي معهم ع اساس اناقشهم .. وبحكيلهم عيب وما بصير وحرام والله أعلم شو ظرفها وأكيد إنها بنت عالم وناس ، بس صارمة عندها حالة طارئة خلاها تطلع لابسه هيك وبوقت متأخر ..

انا شخصيا ما عندي مشكلة بلبسها وتوقيتها .. بس بحاول أقرب ع التخلف العقلي للشباب ..

واحد منهم قعد يقول البنت المحترمة لو تموت ما طلعت بدون ما تحت .. فجأة الثاني زعل من صاحبه .. انا فكرت انو كبر عقله .. طلع زعلان لانو برأيه “ليش أصلا البنت تطلع (لابسه او مش لابسه) ..

اقسم حسيت حالي واقف مع رجال الكهف .. شو احكيلهم وكيف اخلص من شرهم ..
حكيت بدخل من باب الدين .. وقعدت احكيلهم قصص وغض البصر وحرمة الاعراض بالاـ///ــلام وقذف المحصنات .. ودخلنا بنقاش ديني ..

المتحرش طلع حافظ كم حديث عن انو المرأة عورة والحياء في الاـ///ــلام ومن رأى منكر فليغيره .. (بدو يغير المنكر بالتحرش!)
العرص طلع بتحرش ع اساس ديني ..

اثناء الحوار مرينا بمراحل “اترضاه لأختك” و “عدم احتشام النساء سبب البلاء” و “استهداف الغرب للمرأة المـ///ــلمة” و “الرجولة والغيرة على الأعراض” ..
كان حوار من القرون الوسطى .. صعب انفذ منه ..

لكن قدرت افهم رغم أنو التحرش ظاهرة عالمية مش مرتبطة بدين أو ثقافة ، إلا أنو التحرش عنا جزء كبير منه مرتبط بنظرة الرجل للمرأة المبنية على كلام رجال الدين والثقافة اللي شايفة المرأة عورة وناقصة وعيب ..

وقبل ما اتهور واحكيلهم رأيي في هذه الآراء وندخل ع التكفير والزندقة .. قلت بحكيلهم عن لبس نساء العائلة الحاكمة ببريطانيا .. واسألهم عن رأيهم ..
دقيقتين كانوا الشباب ببيوتهم.

ما في حكمة بالموضوع ، بس انو المتحرش لو تناقشه بكل حجج العالم ومنطق العالم ودين العالم ما رح يردعه إلا الخوف من العقوبة فقط.

هاشم العامر | كاتب